Fotowenk: Fokus op die voorwerp
2012-02-07 12:43
Nelius Rademan, ‘n fotograaf van Foto24, skryf:
Dit is altyd moeilik om iets in skaduwee af te neem as ’n mens self in die sonlig staan. (Ek sal dan eerder nie die foto neem nie, tensy dit ’n baie uitsonderlike oomblik is of iets uitsonderliks is, soos dié drie renosters.)
Wat die situasie moeilik gemaak het vir die fotograaf van dié foto, was dat die renosters in ’n skadukolletjie gestaan het en die res van die omgewing om hulle in vol sonlig was. Die enigste raad is om die ligmeterlesing op die renosters te neem en jou beligtingstyd daarvolgens aan te pas.
Neem ’n kol (spot)-lesing op die renosters self, pleks van ’n totale lesing van die hele toneel.
Die effek wat jy dan gaan kry, is dat die renosters se beligting beter gaan wees, maar die res van die toneel se highlights sal oorbelig wees – iets wat jy eintlik moeilik in die redigeringsproses sal kan regmaak.
Nog ’n belangriker punt is om te probeer om op die regte tye van die dag foto’s te neem (ek weet dit is nie altyd moontlik of prakties nie).
Die beste tye is gewoonlik die eerste uur ná sonop en die laaste uur voor sonsondergang.
Dié twee ure van die dag lewer gewoonlik die beste lig vir foto’s op.
Die middel van die dag (tussen 10:30 en 15:30) moet liefs vermy word as dit kom by foto’s neem, aangesien die son te skerp raak en die kontras tussen beligte gedeeltes en skaduwees te groot raak.
Stephen Johnston het dié renosters in die Polokwane-wildreservaat met sy Sony A33-kamera afgeneem.
Volg Nuus24 op Twitter
- Beeld
