Trap van Egipte na die Kaap
2011-05-10 11:34
Vroeg in Januarie het honderd fietsryers uit Egipte vertrek op pad na die Kaap.
Toe daar Vrydag met hulle kontak gemaak is, was hulle by ’n kampeerterrein naby die Visriviercanyon.
Onder die ryers is Marelie van der Merwe, wat haar skoolloopbaan in Langebaan en Saldanha voltooi het voordat sy die laaste jare in Ghana gewoon het.
Van der Merwe kan skaars wag om Saterdag in die Kaap aan te kom. Alle Kaapse fietsryers is al genooi om Saterdagoggend saam met dié avonturiers van Bloubergstrand op die spesiale fietspad tot in die Moederstad te ry.
Teen 13:00 sal daar ’n feestelike stemming heers in die eko-park langs die internasionale sokkerstadion in Groenpunt waar hul aankoms behoorlik gevier sal word.
Toe Van der Merwe Vrydag op ’n satellietfoon gebel is, het sy gesê die Soedan was vir haar die hoogtepunt.
“Die woestyn was wonderlik. Dit was eksoties en anders en die mense het ons oral baie vriendelik ontvang,” het sy vertel.
Haar volgende gunsteling was Tanzanië. “Ons het agt dae lank net op grondpaaie gery. Die paaie was ook baie nat en modderig,” het sy gesê.
“Namibië bly ook een van my gunstelinge. Ek kan net nie glo die toer is al amper verby nie. Ek sien baie daarna uit om weer my vriende in die Kaap te sien,” het die Weskusvrou gesê.
Die onderonsie met die olifant was kort nadat die Zambezi van Zambië na Botswana oorgesteek is. Henry Gold, die man wat Tour d’Afrique begin het, is self vroeër vanjaar deur ’n olifant in Indië aangeval en die ryers is behoorlik ingelig oor die gevare van hierdie groot diere.
“Ons was net 100 m van die olifant af toe hy skielik in ons rigting storm. Ek was die vinnigste om in die teenoorgestelde rigting weg te jaag. Olifante kan 40 km/h haal,” het Van der Merwe op haar blog geskryf.
- Beeld