Etiket op die Tube
2012-02-01 13:25
Kaapstad – Flight Centre het tien wenke vir etiket op die Londense ondergrondse treinstelsel saamgestel wat toeriste in dié stad in gedagte moet hou.
1. Hou regs
Onthou om regs te hou wanneer jy die moltrein en die roltrappe gebruik wat na die platforms lei.
2. Respekteer ander se persoonlike ruimte
Maak plek vir ander passasiers se arms op sitplekke. Koerante en kaarte moet opgevou wees. Moenie oor iemand se skouer loer wanneer die passasier ‘n tydskrif lees of ‘n blokkiesraaisel invul nie.
3. Sitplekke vir ander
Dis goeie maniere om vir ma’s met babas, swanger vroue, gestremde mense of bejaarde passasiers op te staan en jou sitplek aan te bied.
4. Wees tjoepstil en vermy oogkontak
Jou mede-passasiers sal nie harde musiek, selfone of harde gesprekke waardeer nie. Toeriste moenie verwag om ‘n persoonlike verhouding met iemand op die moltrein te ontwikkel nie. Wees bewus van wat om jou aangaan, maar moenie direkte oogkontak met mense maak nie.
5. Hoe gemaak met rugsakke en babas?
Volgens Tube-etiket moet rugsakke van jou rug verwyder en by jou voete neergesit word. As jy met ‘n baba reis, is dit ‘n goeie idee om spitstye te vermy. Die moltrein is stiller tussen 10:30 en 16:00.
6. Die sardien-reël
Daar is nie altyd plek vir nog net één persoon nie. Moenie probeer om jouself by ‘n oorvol waentjie in te druk nie. Wag eerder vir die volgende trein.
7. Breek weg van die massas
Pendelaars is geneig om by die middel van die platform vir ‘n trein te wag. Skuif eerder na die einde van die platform om lang rye te vermy.
8. Moenie huiwer nie. Beweeg!
Almal is haastig om in en uit die treinstasies te beweeg. Maak seker jou kaartjie is by die hekke al gereed sodat jy vinnig kan aanbeweeg. As jy huiwer of te lank neem, sal jy vinnig ontwrigting veroorsaak.
9. Hongerpyne?
Onthou dat ‘n trein ‘n beknopte ruimte is, so wag eerder tot jy afklim voordat jy jou tunablikkie in jou rugsak oopmaak.
10. Beplan
Hou ‘n klein kaart by jou, sodat jy vinnig ‘n alternatiewe roete kan kry indien dit nodig is. Dis ook wys om ‘n Oyster-kaart te oorweeg as jy vir meer as drie dae in Londen deurbring. Dié kaart sal goedkoper uitwerk as wat jy daagliks treinkaartjies koop.
Besoek Flight Centre vir reispakkette of skakel hulle by 0860 400 747.
Volg Nuus24 op Twitter
- Nuus24