Ekonomiese druk knou toerismebedryf
2011-08-12 07:14
Kaapstad – Altesame 118 toerisme-ondernemings in dié stad se omgewing moes die afgelope twee jaar hul deure sluit, só erg is die ekonomiese druk nou op die streek se toerismebedryf.
Maar Mariëtte du Toit-Helmbold, uitvoerende hoof van Kaapstad Toerisme, meen ’n vars aanslag en ’n paar pro-aktiewe strategieë kan die bedryf se groei dalk net weer aanwakker.
“Tradisioneel maak ons op oorsese markte staat vir sowat 80% van ons inkomste, en dié markte word juis die ergste deur die resessie getref,” het sy Donderdag gesê.
“Ons bemarkingstrategieë het ook té veel begin staatmaak op die natuurlewe, ons strande en die ‘groot vyf’, wat nie noodwendig uniek aan ons land is nie.”
Sy het gesê dit skep twee groot blindekolle – plaaslike besoekers wat uit ander streke van die land in die Kaap kom kuier, en ’n groeiende internasionale mark wat toenemend stedelike bestemmings najaag.
“ ’n Groot aantal oorsese toeriste wil stede besoek, plaaslike mense ontmoet en tyd saam met hulle deurbring.
“Hulle wil egte ondervindings hê, eerder as om net ’n bepaalde aantreklikheid te besoek,” het Du Toit-Helmbold gesê.
Ian MacFarlane is ’n internasionale bemarkingskonsultant wat nou met Kaapstad-toerisme aan dié aksieplan saamwerk.
Hy het gesê die land sal moet gouspring om die laaste momentum van die Wêreldbeker-sokkertoernooi vir dié doel in te span.
“Die positiewe indruk wat by mense gelaat is, moet as ’n vertrekpunt gebruik word. Sulke groot byeenkomste lok byna nooit self so baie besoekers nie.”
Die organisasie het onder meer produksiemaatskappye van die TV-kanale Discovery en National Geographic genader om plaaslike stories te vertel, kort wegbreek-pakkette rondom die stad en streek se sosiale kalender te reël, en die Moederstad se lekkerlooproete te laat herleef.
“Mense wil nie net Suid-Afrika se verhale in ’n museum lees nie. Hulle wil dit op straat ervaar,” het Du Toit-Helmbold gesê.
“Daar is geen vinnige manier om dinge reg te ruk nie. Ons moet fundamenteel verander en relevant bly op só ’n manier dat ons ons strategieë oor die volgende vyf tot tien jaar volgens behoefte kan deurvoer en aanpas.”
– Volg Nuus24 op Twitter
- Die Burger