Dié reis-programme moet jy op jou selfoon hê
2011-10-12 14:29
Die visioenêre sakeman, Steve Jobs, is onlangs oorlede en ter nagedagtenis aan sy briljante entrepreneurskap en vindingrykheid, wy Dalene Ingham-Brown ’n inskrywing aan hom.
Daar is vyf reis-programme wat menigte reisdier die noppies ingehad het en daar word steeds wêreldwyd gegons oor Jobs se vernuf om die lewe ’n duisend maal te vergemaklik.
Hierdie vyf programme kan jou volgende reis in ’n gemaklike avontuur omskep.
1. Dankie Skype
Die BBM-slimfoon dink dalk hy is die houtjie van die galg met sy boodskap-funksie, maar niks kon nog naby Skype se flink en gratis diens kom nie.
Met Skype op jou iPhone kan jy nie anders as om die wêreld oor te neem nie.
2. Vreemde gewoontes
As jy jou in ’n vreemde stad bevind en nie ’n idee het wat die kelner as onvanpas sal ervaar nie, is die World Customs-program vir jou.
Ná jy dit afgelaai het, is jou iPhone in staat om vir jou te kan sê of jy moet spoeg of jou bord moet breek om waardering vir die ete te wys.
Deur dié reis-program deur te soek kan jy vinnig ingelig word oor verskillende kulture en hulle gewoontes.
3. Dié app voer jou met die lepel
As jy ’n restaurant-fundi is, is hierdie een gemaak vir jou.
Dié program gee jou ’n vinnige én eerlike oorsig van al die omliggende restaurante.
UrbanSpoon is die beste restaurantgids en behoort 24 uur van die dag aan die gang te wees as jy jou in ’n vreemde stad bevind en die plaaslike kos wil ontdek.
4. Vlug verpas?
Nextflight spoor alle vlugte van meer as 4 200 lughawens op. Jy hoef dus nie meer na die skerm bo jou staar wanneer jy, soos die res van die honderde verdwaalde siele, op soek is na die volgende vlug nie.
5. Hoor, hoor!
Het jy al ooit gedroom van jou eie, persoonlike reisagent wat jou dag en nag vergesel na al die plekke sonder om vir haar koffie hoef te koop?
HearPlanet is tot jou redding! Hierdie program vertel jou (letterlik ) van al die nabye besienswaardighede en tree soos ’n pratende Wikipedia op.
– Lees hier vir meer inligting oor Steve Jobs se iPhone-vindingrykheid.