Christusbeeld in Rio word 80
2011-10-10 13:19
Rio de Janeiro – Dié stad beplan ‘n reuse-partytjie om die 80ste verjaardag van die Christusbeeld, ‘n ikoon van die stad en die hele Brasilië, te vier.
Woensdag se viering gaan ‘n “groot partytjie wees, ek belowe,” het vader Omar Raposo, hoof van die pelgrimsgebied, wat in 2006 die status van Katolieke heiligdom gegee is, gesê.
Miljoene mense het al die standbeeld, wat 38 meter hoog op die 710 meter hoë Corcovado-berg staan, besoek.
Wyle pous Johannes Paulus II het dit in 1980 besoek en sy opvolger, Pous Benedictus XVI, sal na verwagting in 2013 daar besoek aflê.
Die beeld is ontwerp deur die plaaslike ingenieur Heitor da Silva en die kunstenaar Carlos Oswald en is gemaak deur Paul Landowski van Frankryk.
Tot 4 000 toeriste besoek die beeld daagliks.
“Christus maak sy arms oop. Hy staan vir lewe, liefde, hoop. Hierdie monument is baie spesiaal, met die horison as sy mure en die lug as sy dak,” het vader Raposo gesê.
– Volg Nuus24 op Twitter
- Sapa - AFP