Bootdiens na Robbeneiland 'skokkend'
2012-09-13 22:14
Kaapstad – Sommige toeroperateurs raai toeriste aan om eerder nie besoek af te lê by Robbeneiland nie weens vertragings aan veerbootdienste, het ‘n berig Donderdag gelui.
Die toergids Peter Pitout het aan die Cape Times gesê sy groep toeriste was baie ontevrede nadat hulle ‘n ou en oorvol boot moes gebruik.
“Die interaksie-museum is al vir maande onaktief en om dinge erger te maak, het hulle toeriste op die Susan Kruger gesit, wat baie langer neem om daar uit te kom,” het hy gesê.
Lionel Pead, algemene bestuurder van Wilderness Touring, sê daar is gereeld klagtes oor die veerbootdienste.
Die meeste toeriste bespreek toere vooruit by die maatskappy, maar soms moet toeriste se geld terugbetaal word weens vertragings.
“Die eiland het ‘n dringende behoefte aan goeie bestuur,” het Pead gesê.
Shona Khangala, woordvoerder vir die Robbeneiland-museum, het aan die koerant gesê instandhoudingswerk word tans aan die gereelde veerboot, Sikhululekile, gedoen. Dit word vereis ná vyf jaar of 7 000 uur op die water.
– Volg Nuus24 op Twitter
- SAPA
