Bitterpan 'n kamp om oor huis toe te skryf
2010-11-04 14:22
Bitterpan is die mees afgeleë wilderniskampie aan die Suid-Afrikaanse kant van die Kgalagadi, maar het beslis ’n uitsig om oor huis toe te skryf…
Hoewel daar sterk mededinging is, dink ek dié kampie het die beste uitsig in die ganse Kgalagadi: Jy kyk uit oor ’n soutpan en verwag heeltyd iets gaan gebeur, veral as jy weet daar is leeus in die omgewing.
Bitterpan 101: Hoe lyk die blyplek?
Bitterpan is die kleinste van al die wilderniskampe in die Kgalagadi en gebou rondom ’n gemeenskaplike leefgedeelte op ’n houtdek, met twee tafels, twee yskaste (met vrieshokkies) en stoele. Aanweerskante is vier piepklein kamertjies, elk met ’n private dek wat uitkyk op die pan. Agter die kampie is ’n toring vanwaar jy selfs op ’n kameelperdbul sal kan afkyk. Agter die leefgedeelte is ’n gemeenskaplike kombuis met twee gasoonde, tweewasbakke en alle nodige kombuisgereedskap.
Die gemeenskaplike braaiplek is op grondvlak, buite die beskerming van die beligte, omheinde houtdek. Die kamers is net mooi groot genoeg vir twee enkelbeddens. Daar is nie klerekaste nie en ook geen dakwaaiers nie. Elke kamer het ’n badkamer met toilet, stort, wasbak en groot spieël. Die opset is allesbehalwe privaat: Jy deel alle geriewemet jou bure en kan nêrens alleen wees nie. Die kamers is só na aan mekaar dat jy jou bure gaan hoor gesels.
Ander geriewe: Die naaste vulstasie en winkel is op Nossob (53 km) of Mata-Mata (61 km); hier is nie ’n restaurant, winkel of swembad nie.
Wat moet ek bring? Kos, drinkwater en vuurmaakhout
Selfoonontvangs: Geen
Wanneer kan ek inteken? Aankomtyd is 12 vm., en op jou laaste dag moet jy om 9vm. uit wees.
Koste: R795 per kamer p.d. vir 2. (Geen kinders onder 12 nie.)
Dit klink alles goed ,maar…
Vermy dié kamp in die hoogsomer. Jy móét ’n 4x4 hê en bring noodwiele, want die leeus toets graag die 4x4’s se banddruk.
Kontak: 054 561 2000; www.sanparks.org/parks/kgalagadi/
Klik hier vir meer oor Bitterpan