Beste van 2011 se feeste
2011-01-18 08:51
Is jy reg vir 2011 se eerste paar buitelug kuns- en musiekfeeste? GoTravel24 het ‘n paar uitgelig wat jy nie moet misloop nie!
• Origin Fees
Wanneer: 28 – 30 Januarie
Waar: Die partytjieplek moet nog bekend gemaak word.
Hierdie naweek-lange ‘psychedelic trance’ partytjie beloof om ‘n sensoriese fees vir jou ore, oë en jeukende voete te wees. Met meer as 20 verskillende platejoggies oor die drie dansvloere versprei sal jy nie anders kan as om heel naweek jou lyf te beweeg nie.
Origin is bekend vir sy fantastiese dekor, so hou jou oë deurgaans wawyd oop vir kleurvolle kunswerke, sowel as lig- en video vertonings.
‘n Kaartjie sal jou R220 uit die sak jaag as jy vooraf koop en R250 by die deur.
Hou die Origin Fees se webtuiste dop vir verdure inligting.
• Up the Creek
Wanneer: 3 – 6 Februarie
Waar: Net buite Swellendam in die Breederivier Vallei
Wat kan nou beter wees as ‘n prettige naweek-wegbreek na een van die Wes-Kaap se mooiste valleie om al daardie aaklige begin-van-die-jaar-stres af te skud?
Up the Creek bied die moeë stadsjapie net wat nodig is om die siel weer te laat sing: goeie musiek, natuurskoon, ‘n rustieke kampeer-ervaring en hope rivier kapperjolle!
Die eklektiese verskeidenheid kunstenaars wat optree sluit, onder andere, in: Boo!, aKing, Jack Parow, Flash Republic, Karen Zoid, Elvis Blue en The Rudimentals. Die fees is familie-vriendelik en bied selfs ‘n spesiale kinder-area met toesig, prettige aktiwiteite en ‘n springkasteel.
Kaartjies kos tussen R150 en R590, afhangende van wanneer jy koop en hoe lank jy wil bly.
Vir verdure inligting besoek Up the Creek se webtuiste.
• Ramfest
Wanneer: 4-6 Maart in Kaapstad, 9 Maart in Durban en 12 Maart in Johannesburg
Waar: Nekkies Vakansieoord buite Worcester (Kaapstad), Wavehouse (Durban) en Riversands Plaas (Johannesburg).
Ramfest word hierdie jaar vyf en hou sommer behoorlik in drie verskillende stede partytjie.
• Splashy Fen
Wanneer: 21 – 25 April
Waar: Underberg, KZN
Sedert die heel eerste Splashy Fen in 1990 op ‘n plaas in KwaZulu-Natal gehou is, het hierdie grand-dame van Suid-Afrikaanse rock-feeste nog elke jaar net groter, sterker en mooier geword.
• AfrikaBurn
Wanneer: 27 April – 2 Mei
Waar: Tankwa, Karoo
Losweg op die Nevada woestyn se Burning Man gebaseer, is AfrikaBurn vinnig besig om homself as Suid-Afrika se vooraanstaande ‘alternatiewe’ kunstefees te vestig. Die fees-ekonomie werk op ‘n geskenk uitruil sisteem, so beursies kan eintlik by die huis gelos word.
Om meer inligting oor Ramfest, Splashy Fen en AfrikaBurn te kry lees gerus die res van die artikel op GoTravel24.com.
- GoTravel24