Besoeker nr. 21 000 000!
2011-08-11 08:36
Kaapstad - As vlieënier het Johan van Huyssteen al baie wonderlike panoramiese uitsigte geniet, maar Woensdag het hy ’n 360°-uitsig van die Moederstad en omgewing uit sy eie private kabelkar gehad.
Van Huyssteen, van Port Elizabeth, het Woensdag die 21-miljoenste gebruiker van die Tafelberg-sweefspoor geword.
“Ek was so verras. Een oomblik het ek die kaartjies gekoop, en die volgende was daar 20 mense om my met ballonne,” het Van Huyssteen gesê.
Hy en sy vrou, Sharon, is in die Moederstad vir ’n vakansie van drie dae.
“Ons was albei nog laas as kinders op die berg. Dit was meer as 20 jaar gelede, en nou is ons hier ná al die jare en dít gebeur.
“Dit is veral ’n lekker verrassing omdat Sharon môre (Donderdag) verjaar,” het hy gesê.
As besoeker nommer 21 000 000 kon Van Huyssteen en sy vrou die uitsig op ’n mooi sonskyndag vanuit hul eie kabelkar geniet.
Collette van Aswegen, bemarkingsbestuurder van die Tafelberg-sweefspoor, het gesê sy is tevrede dat ’n Suid-Afrikaner dié mylpaal behaal het. “Suid-Afrikaners gebruik gewoonlik die kabelkar oor naweke, dus is ek baie bly vir Johan,” het sy gesê.
Volgens Van Aswegen het dit 30 jaar geneem om die mylpaal van ’n miljoen besoekers in 1959 te bereik. Sedertdien neem besoekertalle baie vinniger toe.
“Verlede jaar in Maart het ons die 20-miljoenste besoeker gehad, en in 2011 is dit ’n miljoen later,” het sy gesê.
Van Huyssteen het verskeie pryse gewen, maar die beste daarvan is waarskynlik die sweefspoor-kaart waarmee hy die volgende jaar pasella tot bo kan gly.
– Volg Nuus24 op Twitter
- Die Burger