Bejaarde misgis nooduitgang vir toilet
2011-11-24 11:10
Hanoi – ‘n Passasier op ‘n vlug van Taiwan na Ho Chi Minh-stad kan moontlik ‘n groot boete opgelê word nadat hy probeer het om 'n nooduitgang oop te maak toe hy dit vir die vliegtuig se toiletdeur misgis het, het plaaslike media Donderdag berig.
Die 81-jarige Taiwannese man het probeer om die deur sowat ‘n uur nadat die vliegtuig van Vietnam Airlines opgestyg het oop te maak, maar ‘n ander passasier het ingetree, het die koerant Dan Tri berig.
Die man, wat sê hy het gedink dit is die deur na die toilet, kan ‘n boete van tot 20 miljoen dong (byna R8 200) opgelê word.
Dit is gewoonlik nie moontlik om die deure van kommersiële vliegtuie op daardie hoogte oop te maak nie, aangesien hulle na die binnekant oopmaak en deur die druk in die vliegtuig toe bly.
Nietemin word dit steeds as ‘n oortreding gesien dat hy probeer het om die deur oop te maak.
‘n Twee-en-twintigjarige student het vroeër die maand ‘n nooduitgang van ‘n vliegtuig wat van Ho Chi Minh-stad na Hanoi onderweg was oopgemaak terwyl dit nog op die aanloopbaan was.
Die student, wat beweer dit was die eerste keer wat hy gevlieg het, het gesê hy het die deur oopgemaak "om die uitsig te geniet".
Die vliegtuig is gevolglik vir meer as twee uur vertraag.
– Volg Nuus24 op Twitter
- Sapa-DPA