BA vlieg weer binnekort na Libië
2012-01-23 15:00
Londen – British Airways se vlugte na die Libiese hoofstad, Tripoli, sal weer in Mei voortgesit word – 15 maande nadat die lugredery sy vlugte opgeskort het weens onrus in die land.
“British Airways beplan om sy vlugte na Tripoli vanaf Dinsdag, 1 Mei 2012 voort te sit,” het ‘n verklaring van die maatskappy gesê.
“Die terugkeer van dienste tussen (Londen) Heathrow en Tripoli kom ná ‘n deeglike veiligheidshersiening in samewerking met die VK se regering en die Libiese owerhede,” het die lugredery bygevoeg.
Volgens ‘n woordvoerder sal die maatskappy ‘n klein Airbus A320 vir die roete gebruik.
“Ons is verheug om na Libië terug te keer,” het Keith Williams, hoof- uitvoerende beampte van British Airways, gesê.
BA het daagliks vlugte na en van Tripoli gehad voor die opstande teen Muammar Gaddafi se regime in 2011.
Volg Nuus24 op Twitter
- Sapa - AFP