Aussies gestrand ná lugredery vou
2012-02-20 11:05
Brisbane – Talle Australiese vakansiegangers en sakereisigers probeer desperaat terugkeer huis toe ná hulle gestrand gelaat is weens die bankrotskap van die Air Australia-lugredery.
Duisende reisigers in onder meer Hawaii en Thailand betaal soveel as Aus $3 500 (sowat R29 000) om plek op vlugte te bespreek ná die lugredery, met sy hoofkwartier in Brisbane, Donderdag in duie gestort het.
Sowat 100 000 kaartjiehouers word deur die skielike vlugkansellasies geraak, met talle wat sukkel om die kaartjiegeld terug te eis omdat hulle kontant daarvoor betaal het.
Sommige versekeringsmaatskappye weier om reisigers se verliese te dek omdat hulle bewus was van die maatskappy se finansiële probleme.
'n Woordvoerder vir Air Australia sê die bestuur het intussen begin om eise uit te betaal, wat na beraming Aus $1 miljoen (sowat R8,2 miljoen) kan beloop.
– Lees hier meer.
– Volg Nuus24 op Twitter.