Ape vier fees in Thailand om toeriste te lok
2011-11-28 12:14
Bangkok – Ape in Sentraal-Thailand is die afgelope naweek bederf met ‘n besonderse fees van vrugte en groente, sowel as disse wat deur vyfsterhotelle voorberei is, in ‘n jaarlikse tradisie wat daarop gemik is om toeriste te lok.
Die jaarlikse “aap-buffet”-fees vind op die laaste Sondag in November by die Pra Prang Sam Yot-tempel in Lopburi, sowat 150 km noord van Bangkok, plaas.
Die ritueel is volgens plaaslike inwoners ‘n fees van danksegging aan Lopburi se 2 000 ape omdat hulle glo goeie geluk en voorspoed bring en toeriste na die omgewing lok.
Plaaslike inwoners het tafels gedek met vars produkte, poedings en reuse-ysblokke, wat gevolglik deur die ape verslind is terwyl inwoners en buitelandse toeriste dié fees aanskou het.
Sedert dodelike vloede die land geruk het, het kospryse aansienlik gestyg en gevolglik het die fees 500 000 baht (R134 860) beloop.
– SkyNews.co.au
– Volg Nuus24 op Twitter