Antieke klokkie in Jerusalem gevind
2011-07-23 10:31
Jerusalem – ‘n Klein goue klokkie wat sowat 2 000 jaar gelede
gedurende die Tweede Tempel-periode hier weggeraak het, is tussen bouvalle
in die Ou Stad gevind, het owerhede in Israel gesê.
Die klokkie was vermoedelik aan die kledingstuk van ‘n eertydse
senior beampte vasgewerk en is ontdek tydens opgrawingswerk in ‘n dreinkanaal
in die Dawidstad, ‘n gedeelte van die Arabiese buurt Silwan, net suid van die
Ou Stad se muur.
“Die hooggeplaaste beampte het blykbaar in
Jerusalem se strate geloop toe die goue klokkie in ‘n dreinkanaal onder die pad ingeval
het,” het ‘n verklaring van die Israelse Owerheid vir Oudhede gelui.
“Dit is onmoontlik om verseker te weet of dit wel aan ‘n Joodse
hoë priester behoort het, hoewel hulle bekend was daarvoor dat hulle met sulke
klokkies aan hul klere geloop het.”
– Volg Nuus24 op Twitter.