Air Zim steeds lamgelê deur staking
2011-08-02 11:05
Harare – Alle vlugte van Air Zimbabwe is steeds gekanselleer en honderde passasiers is gestrand gelaat op die vyfde dag van 'n staking deur vlieëniers, berig RSG.
Onderhandelings tussen vlieëniers en die lugredery wat reeds dae lank duur, het nog niks opgelewer nie.
“Onderhandelinge gaan steeds voort omdat daar tot dusver nie enige ooreenkomste aangegaan kon word nie,” het David Mwenga, Air Zimbabwe se bestuurder vir Europa, gesê.
"Die vlieëniers staak omdat hulle reeds twee maande se salarisse en toelaes geskuld word."
Dit beloop sowat R2 miljoen.
Dit is hulle vierde staking vanjaar.
Daaglikse vlugte na Johannesburg en weeklikse vlugte na Londen en Beijing in China word geraak en passasiers is aangesê om alternatiewe reisreëlings te tref.
Die lugredery verloor sowat R300 000 rand per dag.
Air Zimbabwe sukkel om sy salarisse en rekeninge te betaal en maak staat op regeringshulp.
Die lugredery het 46 vlieëniers wat op drie internasionale roetes diens doen.
– Volg Nuus24 op Twitter.
– RSG