Air Algerie-stakings laat duisende gestrand
2011-07-14 15:10
Parys – 'n Staking deur die kajuitbemanning van Air Algerie het duisende vakansiegangers vir 'n vierde dag op lughawens in Parys, Marseille, Nice en Algiers gestrand gestrand gelaat.
Die werkers dring op ‘n salarisverhoging van 106% aan.
Die staking het Maandag begin en al die lugredery se vlugte moes sedertdien gekanselleer word in ‘n tyd wat baie Franse inwoners hul jaarlikse besoek aan familie in Noord-Afrika bring.
Honderde woedende passasiers moes Woensdagnag op onder meer die Orly-lughawe in Parys slaap.
Air Algerie het passasiers versoek om nie by lughawens op te daag nie, maar talle mense het steeds daarop aangedring dat hulle op vlugte geplaas word.
“Ek het 600 Euro vir ‘n kaartjie betaal. Dit is onaanvaarbaar. Air Algerie se tyd is verby,” het ‘n onstelde passasier, Leila Boubekeur, gesê.
Die Franse minister van vervoer, Thierry Mariani, het verteenwoordigers van die lugredery, die Algeriese ambassade en die verskillende lughawens byeengeroep om alternatiewe maniere te vind om reisigers na hul bestemmings te neem.
Die lugredery sal na verwagting vandag passasiers met gehuurde vliegtuie en veerbote van Marseilles oor die Mediterreense see na Algiers neem.
Onderhandelings met die unie wat die kajuitbemanning verteenwoordig, is intussen gestaak en daar was die afgelope paar dae geen kontak tussen die werkers en die bestuur nie, het Yacine Hamamouche, president van die unie, gesê.
Mohamed Salah Boultif, hoof van Air Algerie, het Dinsdag gesê die lugredery is bereid om ‘n verhoging van 20% aan sy werkers toe te staan.
Volg Nuus24 op Twitter.
- Sapa - AFP