9/11-gedenkplek nou oop vir publiek
2011-09-15 13:48
New York – Vir die eerste keer sedert die terreur-aanvalle op die World Trade Centre, kan die publiek nou die 9/11-gedenkplek in New York besoek, berig CNN.
Die New Yorkse burgemeester, Michael Bloomberg, het Maandag saam met lede van die stadsraad en familielede van die 9/11-slagoffers, die eerste besoekers aan die gedenkplein welkom geheet.
“Die opening van die plein voltrek ‘n belofte wat ons op die tienjaar-herdenking aan die families van slagoffers gemaak het, dat die wêreld vir ewig ‘n plek sal hê waar mense kan nadink oor wat gebeur het en die slagoffers geëer kan word,” het Bloomberg gesê.
“Ons is so trots op hierdie gedenkplek,” het Monica Iken, wie se man, Michael, in die aanvalle dood is, gesê. “Ek kan Michael gaan besoek. Hy is tuis.”
Besoekers moes die afgelope week deur metaalverklikkers en sekerheidskameras beweeg voor hulle na die twee reuse, vierkantige fonteine wat die “voetspore” van die World Trade Centre se torings uitbeeld, kon gaan kyk.
Die fonteine word omring met bronsplate waarop die name van die bykans 3 000 mense wat in die aanvalle dood is, asook die name van die ses mense wat in 1993 in ‘n bomontploffing in ‘n parkeerterrein onder die geboue dood is, gegraveer is.
– Lees meer hier.
– Volg Nuus24 op Twitter.
– CNN