Yslanders maak hul huise oop vir besoekers
2011-11-23 12:08
Kaapstad – Inwoners van Ysland maak hul huise oop aan reisigers in ‘n inisiatief om besoekers ‘n outentieke Ysland-reiservaring te bied.
Die Inspired by Iceland-inisiatief is deur die Yslandse president, Ólafur Ragnar Grímsson, van stapel gestuur. As deel van die inisiatief nooi hy besoekers om pannekoek met room en suiker by sy presidensiële woning te kom geniet.
“As jy Ysland in die volgende paar maande besoek, belowe ons om jou soos ‘n Yslander te behandel en almal van ons bied ‘n persoonlike ervaring om te verseker jy kry die beste uit jou tyd by ons,” het hy gesê.
Inwoners plaas hul uitnodigings op die amptelike webwerf www.inspiredbyiceland.com saam met ‘n tyd, datum en die hoeveelheid gaste wat hulle kan akkommodeer.
Sommige van die geleenthede wat oor die volgende ses weke aangebied word, sluit in:
Blót – ‘n Antieke Wiking geloofseremonie van die oorspronklike geloof van Ysland wat op 1 Desember gehou word, gevolg deur kjötsúpa, die tradisionele Yslandse vleissop.
Op 6 Desember nooi Eva en Anita Rut mense na hul verhitte buite-swembad by hul grootouers se gastehuis, genaamd Dalbaer, in die suide van die land.
Op 10 Desember word ‘n skaapkop-fees gehou waar brennivín-snaps ook bedien sal word.
– Lees meer by Wanderlust
– Volg Nuus24 op Twitter