Ysland: 'n Plek van natuurlike wonders
2011-09-13 17:56
As jy Ysland se ou landskappe besoek, voel dit asof jy terug beweeg in tyd.
Asemrowende watervalle, fjords, vulkane, berge en gletsers is oor hierdie klein eiland versprei en op ‘n toer deur die land sal jy vind dat dit vol natuurlike wonders en rare skoonheid is.
“As jy eers daar was sal jy vind dat daar iets omtrent Ysland is wat diep in jou inkruip en maak dat jy nog wil hê,” het CNN se verslaggewer Mallory Swanson gesê.
“Elke keer as jy dink jy het die mooiste ding in die wêreld gesien, sal jy om nog ‘n draai ry en jou top-10 lys weer moet op dateer.”
Daar wag ‘n avontuur om elke draai.
Plaaslike inwoners en besoekers stem saam dat die beste manier om Ysland te verken, is om ‘n twee week lange toer te beplan.
Enigiets korter en jy sal van die ongelooflikste skoonheid op dié juweel in die Noord-Atlantiese Oseaan misloop.
“Ek het al na 30 lande gereis en ek kan sonder enige twyfel sê dat Ysland die mooiste plek is wat ek nog ooit gesien het, om nie eens te praat van die warmte en humor van die mense nie,” het verslaggewer Patrick Watts gesê.
Met tye sal jy geïsoleer voel in die amper spookagtige skoonheid van die land. Dit is die vreugde van ‘n besoek aan Ysland; dit is werklik ‘n plek om heen te ontsnap, weg van alles wat jy ken.
– Lees meer by CNN
– Volg Nuus24 op Twitter