Top-snorkelplekke in Suidelike Afrika
2011-11-22 15:36
Om jou midde-in die seelewe met al sy gediertes te bevind, ver verwyderd van ’n flikkerende Blackberry en verkeersknope, is soos om in ’n ander wêreld te ontwaak.
As jy eers besluit het om die alewige foon teen jou oor met ’n snorkelpyp te vervang, sal selfs die kleinste poeletjie ’n onvergeetlike ervaring wees.
Om die seelewe van naby te verken en kleurvolle diertjies en groter waterbewoners vir ure agter ’n duikbril dop te hou, is ’n stokperdjie wat jou nie te veel uit die sak sal jaag nie en waarvoor jy nie sommer moeg sal raak nie.
Neem dié gewilde stokperdjie na die volgende vlak en ontdek die seelewe in al sy glorie.
1. Sodwanabaai
Sodwanabaai spog met een van die gewildste snorkelgedeeltes in die wêreld. Vir ’n indrukwekkende verskeidenheid seelewe, tropiese koraalbanke, en skeepswrakke uit ‘n vervloë tydperk, is Sodwanabaai die plek om te wees.
Die beste duikgeleenthede is gedurende April tot September. As jy ‘n beginner is hoef jy jou nie te bekommer nie; snorkeltoerusting kan gehuur word.
2. Aliwalrif
Aliwalrif is aan die suidelike kus van Kwazaulu Natal geleë en is bekend vir sy skeurtandhaaie, tropiese spesies en kouewaterspesies.
Die biodiversiteit aan die Suidkus is iets om te aanskou. Vir die meer avontuurlustiges is daar Shark Park, ’n mariene bewaringsgebied aan die suidkus, wat die Aliwalrif insluit.
Hier kan jy die magtige teenwoordigheid van meer as elf haai-spesies ervaar terwyl jy tussen hulle swem.
3. Maputaland
Om naby Kaap St. Lucia gedurende laagwater te duik, is op enige passievolle duiker se doenlysie.
Te danke aan sy ryk biodiversiteit en warm klimaat, is die Kosibaai-natuurreservaat aan die Mosambiekse grens die ideale snorkelgebied. Die warm waters oor die koraalrif is prentjiemooi, om nie eers te praat van dít wat jy onder die water kan sien nie.
– Lees hier vir meer oor ons land se snorkel- en duik-plekke.
– Volg Nuus24 op Twitter