Dit was skrikwekkend wat in die Wes-Kaap gebeur het, waar werkers met geweld, suksesvol daarin geslaag het om ander partye te dwing om toe te gee aan hul eise.
Die regering is selfs bereid om dringend wetgewing te verander sodat die minimum loon vasstelling vir plaaswerkers wil verhoog.
Ek was vir 47 jaar betrokke in die vakbondbedryf van SA en vir die laaste 20 jaar hoofsekretaris van een van die Transnet vakbonde en is ernstig bekommerd wat nou gebeur en wat vorentoe, en dan in jare wat mag volg, ten opsigte van salarisaanpassings.
Alles het begin by Marikana waar werkers dit reggekry het om buitensporige aanpassings te kry, deur selfs hul vakbonde die deur te wys en met geweld vermag het wat selfs nie deur enige vakbond sou kon gemotiveer word nie.
Ons was baie jare gelede jaarliks betrokke gewees met “collective begging” deurdat ons by die betrokke minister van vervoer gaan pleit en soebat het vir ‘n aanpassing en daar was tye wat ons met leë hande aan ons lede moes gaan verduidelik dat die regering nie ‘n verhoging kan bekostig nie.
Dit het selfs so ver gegaan dat die regering een jaar sommer 25% van die werkers se 13de tjek ‘geleen’ het en dit was nooit terugbetaal nie. Selfs ‘n gesoebat by die destydse staatspresident, PW Botha, was nie suksesvol nie.
Daarna het ons in die laat 80's daarin geslaag om ‘n bedingingsraad te stig, om die speelveld gelyk te maak, waar ons jaarliks kon onderhandel vir beter salarisse en voordele (kollektiewe onderhandeling) en ons was baie suksesvol gewees.
Nou is dit nie meer kollektiewe bedel, of kollektiewe onderhandelinge nie, maar werkers het nou met “kollektiewe geweld en wetteloosheid” die geskiedenis boeke herskryf.
Hoe kan dit toegelaat word dat hoofweë soos die N2 net eenvoudig toegemaak word deur werkers en hulle brand en breek alles af wat voorkom en dan is daar nog politieke leiers wat hulle aanhits?
Dit is anargie en moet gestop word anders gaan SA in die toekoms regeer word deur werkers. Betrokke partye, soos die regering en werkgewers moet die tipe “onderhandelinge” nou stop anders gaan dit onregeerbaar word in SA.
Die reg om te staak is in die grondwet vasgevat om werkers die geleentheid te gee om hul ongelukkigheid te demonstreer, maar dit gee geen werker die reg om onwettig te staak en ons land stukkie vir stukkie af te breek nie.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
