Iets waaroor daar nou glad nie meer twyfel kan bestaan nie is dat die ANC-alliansie nie opgewasse is om die land te regeer nie en besig is om 'n totale gemors van die landsbestuur te maak.
Onderwys kan uitgelig word want geen land met 'n mislukte onderwysstelsel het nog ooit op enige gebied gepresteer nie. Dis veral ons primêre- en sekondêre-onderwys wat tans onder die swakste wêreldwyd gereken word.
Die ander staatsdepartemente presteer ook nie en word gekenmerk deur wanbestuur, wanbesteding, korrupsie en powere dienslewering.
Die toedrag van sake kan hoofsaaklik toegeskryf word aan onbevoegdheid dwarsdeur die stelsel van munisipaliteite tot by die nasionale regering. Daar is enkele uitsonderings onder andere die DA-beheerde Wes-Kaap.
Die vraag is nou waarom onbevoegde mense aangestel word? Is daar dan nie in Suid-Afrika kundiges vir die posisies nie?
Daar is, maar hulle word tot 'n groot mate uitgesluit weens die beleid van regstellende aksie en transformasie. Die regering wil op alle vlakke van die staatsdiens die demografie weerspieel en steur hulle min aan meriete by aanstellings.
Nog 'n euwel is kaderbemagtiging waar mense wat heeltemal onopgewasse is, beloon word vir hulle steun met posisies, veral op seniorvlak. Die meeste kabinetministers is voorbeelde.
Is daar dan geen oplossing vir die probleem nie?
Daar is, maar dan sal die ANC 'n totale kopskuif moet maak en wegbeweeg van eiebelang en tydelike voordele en die land se belang eerste stel.
Dit kan gedoen word deur die landsbestuur te deel met ander partye en ook te vergeet van rassevooroordele. Die tipe van alliansieregerings word in baie lande toegepas. Dit verg egter politieke volwassenheid en grootmoedigheid en afstand doen van hebsug en eiebelang. Dan kan al die kundigheid in die land benut word en al die posisies kan met bekwame mense gevul word.
Kundiges sal dan byvoorbeeld die onderwys beheer en nie persone wat beloon word vir hulle steun aan die president soos Angie Motshekga en Blade Nzimande nie. Seniorposisies soos kabinetsposte en direkteure-generaal kan proporsioneel volgens die grootste partye se presentasie steun gevul word.
Om so iets te vermag sal hare op die tande verg, maar om aan te gaan soos tans beteken dat ons Ikabod kan skryf oor ons toekoms en kan regmaak om bekend te staan as: Die Piesangrepubliek Suid-Afrika.
Die wat nog glo die ANC kan op sy eie regmaak wat verkeerd is, is naief en het totaal kontak met die werklikheid verloor.
Pres. Barack Obama het pas na sy oorwinning die Republiekeine genooi om saam te werk om die VSA se probleme te pak anders as die ANC wat die opposisie sien as die vyand wat vernietig moet word.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
