Die jaar 2012 gaan vir baie mense, indien nie die meerderheid Suid-Afrikaners nie, afsluit as 'n groot teleurstelling.
Die getwis en gekibbel wat nou by Mangaung aan die gang is en Zuma wat weer as leier verkies is, laat dinge nie te rooskleurig lyk vir 'n beter 2013 nie!
Boonop lyk dit asof die "nar" Malema ook weer planne het om weer te begin om dinge deurmekaar te krap met sy toesprake en aanhitsings, want hy is skynbaar nou weer besig om witvoetjie te soek om weer aangestel te word in sy vorige posisie.
Gaan hy toegelaat word om terug te kom; en as dit toegelaat word, onder watter voorwaardes? Een daarvan sal seker wees om sy mond te snoer op sekere punte en sekere individue.
Trevor Manuel besef nou eers onder watter gemors hy tans diens doen en om nou te wil tou opgooi, is soos Pontius Pilatus wat sy hande in onskuld wil was; want hy is by assossiasie seker aandadig/ verantwoordelik vir die wandade wat deur sy mede-amptenare gepleeg het.
Wat Kgalema Motlanthe se planne is, is seker net hy van bewus, want op die huidige oomblik weet g'n mens wat sy modus operandi is nie: een oomblik is hy in opposisie teen Zuma en die volgende is hy nie meer verkiesbaar nie; soos 'n kind wat nie weet wat hy wil hê nie en skoon rigtingloos!
Hoe kan 'n mens vertroue het in 'n persoon wat self nie weet waarheen hy gaan of wat hy wil bereik nie? Emeritus-aartsbiskop dr. Desmond Tutu wil bid vir die regering soos hy gebid het vir die apartheidsregering van destyds...?
Sy gebede moet liefs gemik word op die menigtes wat die huidige regering ingestem het; bid dat hulle oë geopen word sodat hulle kan sien wat en wie hulle met hul stemme aan bewind geplaas het! Zuma is horende-doof en siende-blind en verkies om soos die spreekwoordelike volstruis, kop in die sand te steek en homself wys te maak dat alles in Suid-Afrika vlot verloop.
Vir hom en sy kaders is dit vanaf 2012 na 2013 'n gladde verloop van Mangaung na Nkandla!
Vir ander gewone Suid-Afrikaners sal 2013 net weer 'n jaar wees van probeer/poog om die gemors wat deur regeringsamptenary veroorsaak was/ is, reg te maak of om te probeer om daarmee saam te leef.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
