Toe Nelson Mandela vrygelaat is het julle skouer aan skouer met hom geloop.
Toe die "nuwe demokratiese Suid-Afrika" aangekondig was, het julle met gebalde vuiste in die lug, saam met die menigtes geskree: "VIVA ANC en SUID-AFRIKA!"
Toe Mandela as eerste swart president van die land ingehuldig word, het julle in ekstase en eufories saam met die skare gejubel.
Nou, dat die land en sy mense so "verontreg" word deur regeringslui, waar is julle nou? Wat dink en doen julle, as julle lees en hoor van die geknoei, gekonkel en gestelery?
Waarvoor het julle deelgeneem aan die "struggle"; soveel lyding moes deurstaan; om net stilswyend toe te kyk hoe al jul drome en visies van 'n "demokratiese" Suid-Afrika deur individue vernietig en ondergrawe word?
Geen oomblik/geleentheid het julle laat verbygaan om die mense bewus te maak dat julle "vryheidsvegters" was nie; vegters vir die verontregtes.
Waar is julle met jul kennis en ondervinding om mense soos Malema en kie te wys op "die dwaasheid van hul weë"? Wat dink Mandela oor jul stilswye oor alles wat om julle gebeur en wat die gewone Suid-Afrikaner hom ontneem van sy basiese menseregte?
Waarom die stilswye oor die oop en blote korrupsie, nepotisme en alles waarvoor julle "geveg en gestry" het? Het julle ook maar net leë beloftes gemaak? Het julle ook maar net gewag tot die "soustrein", waarvan julle met soveel minag gepraat het, by julle aandoen?
Het julle ook gewag vir jul deel en het soos "diewe in die nag" skalks verdwyn, met hande "druppend" van die "soustrein" se "sous"; of pla julle gewete julle oor beloftes wat gemaak was en nooit nagekom sou word nie?
Wat het geword van Jay Naidoo, Trevor Manuel, Cyril Ramaphosa, Ebrahim Rasool, Cheryl Carolus, Patricia de Lille, en baie ander? Waarom die stilswye?
Waar is julle nou, noudat die land besig is om te verrot van bo af; noudat dit bloot gaan oor wie vir wie ken; noudat dit gaan oor hoeveel regeringslui kan inpalm, ten koste van die "comrades" waarvoor julle "geveg" het?
Waar is julle nou?
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
