WP se sege Saterdag oor die Sharks het hulle as Curriebeker-kampioene vir 2012 bekroon.
Hulle het dit reggekry sonder die "fisiese" hulp van staatmakers en ervare spelers soos Schalk Burger, Tiaan Liebenberg, Siya Kolisi, Nizaam Karr, Marchelle Brache en hul eerste keuse kaptein, Jean de Villiers, onder andere.
Nou bring dit 'n vraag op: Heyneke Meyer wat 'n "voorstaander" van Blou Bul-rugby is, se seleksie van Springbok-spelers die jaar, het sterk Blou Bul-kant toe geneig, al het hulle (die Blou Bulle) omtrent die hele seisoen teen spanne onder andere die Griekwas, lelik vasgeval; hoe gaan sy seleksie van spelers nou lyk?
Eben Etzebeth, Deon Fourie en 'n mens kan jou verstout die hele “jong” WP-span, het met Saterdag se vertoning en sege oor die Sharks en die oorwinning in die semi-finaal teen die Lions behoorlik sy (Heyneke Meyer) kaarte kom deurmekaar krap!
Voeg Bryan Habana by diegene wat nie aan Saterdag se wedstryd deelgeneem het nie, dan is dit voorwaar 'n klomp "groentjies" wat die Curriebeker verower het!
Saterdag se vertonings van beide die losskakels het weereens bewys dat die spel nie heeltyd rondom hulle moet wentel/ draai nie; anders as die "voorkeure" van Meyer dat alles skynbaar begin en moet eindig by Morné Steyn of enige losskakel wat hy inspan.
Die jong voorry van WP het al drie meer as hul man gestaan teen die Springbok-veterane van die Sharks: nog 'n "Bul-voorkeur" van Meyer, wat Saterdag bevraagteken was met die drie "kannetjies" van WP se voorry!
En as 'n mens dink aan die strafskoppe wat Ollie le Roux (Cheetahs), Werner Kruger en ander Blou Bul-voorrymanne al op kritieke stadia afgestaan het, wonder 'n mens onwillekeurig of Meyer nogeens gaan volstaan by sy eerste keuses as voorry!
Toegegee, Saterdag se wedstryd beteken nie die WP het die beste voorry in die land nie; hulle het egter gewys dat die wil om te wen soms baie meer werd is as ervaring!
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
