Jong, weer Hannes hierso. Toe ek die besluit geneem het om my stories met julle te deel, het ek nie gedink dat apokalips so naby was nie.
Ek het nog baie stories om vir julle te vertel; ongelukkig lyk dit vir my asof hierdie een, die laaste een sal wees – weens die gevreesde 21 Desember 2012.
Ek het gewonder oor hoe om vir julle totsiens te sê, natuurlik na ontelbare krokodiltrane, toe sien ek die lig – soos die mense wat gisteraand in Kaapstad glo ‘n vreemde lig van ‘n vreemde voorwerp gewaar het. So ’n lig het my die lig laat sien…
Almal soek skuilplek as gevolg van die apokalips op die horison, wel, ek sien baie voordele daarin. Hier volg vyftien voordele vir my, van die einde van die wêreld.
1. Ek hoef nie meer my huis te betaal nie. Dis hartseer want ons het sopas ingetrek. Ag wel, dis maar hoe dinge gaan eindig né?
2. Ek hoef nie meer my kar te betaal nie. Skaars ‘n jaar oud, so die res word hopelik gedek deur my versekering.
3. Indien my versekering die apokalips oorleef, hoef ek nie ooit weer met hulle te deal nie. Vra altyd die onnoselste vrae en die hoogste pryse, maar gee in elk geval niks terug nie.
4. Ek hoef nie myself te bekommer oor my salaris hierdie maand nie. Ek sou in elk geval net kersgeskenke gekoop het en in elk geval nie een van die bogenoemde items betaal het nie. Gelukkig hoef ek nie nou skuldig te voel daaroor nie.
5. Ek hoef nie kersgeskenke te koop nie. Hoekom mense in elk geval geskenke moet koop op Kersfees gaan my verstand te bowe.
6. Ek hoef nooit weer Boney M te hoor nie.
7. Ek hoef nooit “Jingle Bells te” hoor nie.
8. Ek hoef nooit weer “Auld Lang Syne” te hoor nie, en ook nie oor ons land se toekoms te bekommer nie.
9. Ek hoef my nie te kwel oor die stand van die wêreld of oor aardverwarming of die ekonomie nie.
10. Ek hoef nie te kommer oor my stukkende reënmetertjie en die gras wat nog geplant moet word nie.
11. Ek hoef nie bekommerd te wees oor my alarmstelsel wat nie werk nie en geweld in die geheel, pla my nie meer nie.
12. Ek hoef nie te bekommer oor my projekte wat nog nie voltooi is nie.
13. Ek hoef nie die projekte te voltooi nie.
14. Ek hoef nie hierdie artikel te voltooi nie
15. Of moet ek?
Hierdie is maar persoonlike goedjies wat my nie gaan kwel nie, want ons almal gaan kapoet wees op die 21ste. Indien julle hierdie artikel lees, hoef julle nie te veel te worry om kommentaar te lewer nie, want ek gaan dit heel waarskynlik nie lees nie.
Sê my, het julle al die fliek Left Behind gekyk – doen dit. Julle sal my heel waarskynlik weer hier kry…
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
