Elke keer as 'n mens die kommentaar op artikels lees, lees jy kritiek,en nogal hoofsaaklik afbrekend van aard. Gesien in die lig onder watter omstandighede Suid-Afrikaners vandag leef, is dit dalk nie so snaaks dat hulle/ ons swartgallig en bitter klink of voorkom nie.
Korrupsie in die regering, renosterhoring- en perlemoenstropery, seks- en dwelmslawerny, roof en inbrake, plaasmoorde, verkragtings, padongelukke, as gevolg van onpadwaardigevoertuie, en roekelose bestuurders, staatsdepartemente en munisipaliteite wat nie funksioneer soos dit moet nie, as gevolg van onbevoegde amptenary en ander faktore en les bes, 'n president wat nie 'n flenter omgee vir die landsburgers nie en sy belange eerste stel!
Glad nie 'n land wat vir sy burgers lyk na die aangewese plek om kinders groot te maak nie. Inteendeel, dit skyn asof die Bybelse Sodom en Gommora, maar "mak plekkies" was in vergelyking met Suid-Afrika van vandag.
My eintlike rede waarom ek die dinge noem, is dat daar vir al die probleme tog oplossing(-s) behoort te wees: onverskillige bestuurders, veral taxi-bestuurders moet onmiddellik afgetrek word, passasiers moet net daar uitklim en die voertuig geskut word en bestuurder/ eienaar kry dit nie weer terug voordat die boete nie betaal is nie.
Sy passasiers sal hom ook vermy en/ of hel gee, as dit gebeur en hulle moet nou ander maniere soek om by hul verskeie bestemmings te kom.
Verskerp die vereistes om die land binne te kom en maak dit moeiliker om hier te kom vestig of volg die voorbeeld van Australië en Nieu-Seeland deur streng doeane-wette in te stel en toe te pas; dwelmsmouse en oortreders in mensehandel moet behandel word soos oortreders in lande en plekke soos Thailand; Bangkok - 15 jaar tot lewenslange tronkstraf.
Kyk maar wat gebeur met "muile" in die dwelmhandel. Al is jy van 'n ander land afkomstig. Dieselfde vonnisse moet ook geld vir renoster- en perlemoenstropers. Hulle sal maniere probeer vind om met hul onwettighede voort te gaan en daarom moet die owerhede pro-aktief wees: "to catch a thief, one must think like a thief".
Korrupsie kan gestop word deur eerstens "kandidate" vir sekere poste te keur deur "onafhanklike liggame/ kommissies" wat geen baat sal vind by die aanstelling van sodanige "kandidate" nie. Met ander woorde, kyk wat die persoon vermag het en tot waartoe hy/ sy in staat is op sy/ haar gebied van deskundigheid. Gaan 'n kandidaat se geskiedenis na, al moet dit wees om te gaan soek vir "geraamtes in sy/ haar klerekas" soos met die Amerikaanse verkiesingsveldtogte.
Dit sal ten minste 'n voornemende "kandidaat" tweekeer laat dink voor hy/ sy hom/ haar verkiesbaar sal stel vir enige pos en sal meer met omsigtigheid te werke gaan en kan bydra tot 'n meer positiewe benadering tot publieke belange.
Oplossings is in baie gevalle 'n langtermynproses, maar oplossings vir renosterstropery, misdaad, plaasmoord (-e), roekelose bestuurders, ens. behoort korttermynprojekte te wees en dus voor op die prioriteitslys van die regering te wees.
So, kom ons los vir eers die swartgalligheid, laat vir 'n paar oomblikke die afbrekende kritiek eenkant staan (alhoewel 'n mens nie persone in die huidige situasie daarvoor kan verkwalik nie) en dink aan sinvolle en langdurige oplossings en lê dit voor aan die "powers that be".
Tekortkominge sal daar wees, maar tenmiste is die ingesteldheid darem (hopelik) positief!
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
