Jy verwonder jou aan die jeug en skoolkinders van vandag. Respek is skynbaar iets waarvan hulle nog nooit gehoor of gesien het nie.
Vroegoggend voor die skool begin, sien jy leerders in skooluniform met 'n sigaret wat langer as hy/ sy self is, staan en rook voor volwassenes; heeltemal traak-my-nie-agtig! Nou vra jy jouself af: "Word hy/ sy dit toegelaat om voor sy/ haar ouers te rook?' Sekerlik nie?
Het die ouers miskien nagelaat om aan daardie kind die lewensles van respek teenoor jou meerdere of volwassenes te alle tye te betoon, te leer? Waar is daardie leerder se trots om aan die skool verbonde te wees, wie se uniform hy met soveel minagting dra? Daardie "engeltjie" by die huis verander blykbaar in 'n "monster", sodra hy/ sy by die deur uitstap.
Klim op enige publieke vervoermiddel (bus/ trein); die eerste ding wat 'n mens oplet is die skoolkinders wat die bus/ trein oorneem asof dit hulle s'n is: selfone bler musiek wat jou tot raserny kan dryf, tesame met hul "geselsies" wat oorverdowend is, want blykbaar moet almal hoor hoe Janet vir Susan ingevlieg het oor een of ander kêrel; wie was gisteraand by wie; wanneer die volgende jol gaan wees, ens.
Die arme pendelaars wat nog deur die slaap is of wat nog hoop om die gedagtes en werksprogram vir die dag in die kop probeer agter mekaar te kry, bestaan vir hulle nie. Opstaan en plek aanbied vir tannie, oom, meneer of dame was nog nooit aan hulle verduidelik nie.
"Antie" of "oom"of somtyds "mister" kan maar staan, hulle het mos betaal vir hul sitplek, waar hulle gewoonlik nie sit nie, maar rondhop en -spring tussen al die krete en geskree deur.
Kleredrag of die manier hoe dit gedra word, moet op 'n spesiale wyse gedra word, anders is dit nie IN nie: broeke wat onder die sitvlak hang en "boxer" wat bo-oor loer, net om te wys "ek is ook hier"! Wolmusse en hoede tot op die neus getrek, al wat sigbaar is, is die punt van die neus, mond (somtyds) en ken!
Of die "hoodies" wat alewig opgeslaan moet word, al is dit hoe warm die dag. Net omdat dit in Amerika so gedra of doen word. Die gepaardgaande lyftaal, houdings en maniertjies is om van naar te raak: "pure skollie of "gangster"!
Kerktoe-gaan is ook 'n ander saak: te moeg om Sondae op te staan vir kerk, maar as Donderdag verby is, is hulle soos renperde wat te lank op stal was.
Ure voor die spieël en een outfit na die ander aanpas, net om na 'n braai te gaan. As Sondag dan so gelukkig is en hulle gaan kerk toe, word die naaste broek (gewoonlik 'n jeans) en hemp of T-hemp, as daar nie gekeer word nie, gegryp en aangetrek.
En die woorde word jou nog toegevoeg as "herkouseltjie": "hulle sê, KOM SOOS JY IS!" Probeer verduidelik dat jy respek teenoor andere/ oueres moet betoon en dit moet begin met respek vir jouself, word jy baie gou geantwoord: "Ander moet hulle besighou met hul eie goed/ besigheid."
Gaan hulle vir die een of ander onderhoud, is dit met die houding: "kry ek dit is dit OK; kry ek dit nie, maak dit ook nie saak nie."
Ouers is vandag so oorlaai in die tegnologiese ontwikkelende wêreld, dit skyn asof eenvoudige lesse soos respek teenoor ander en respek vir jouself, oorgelaat word aan ander of die kind moet dit maar self aanleer.
Kleutertjies weet vandag nie hoe om iemand te groet nie; hoe gaan hy dit leer as mammie/ pappie nie vir hom dit leer nie; miskien is dit meneer/ juffrou se werk om basiese maniere by die kind in te skerp.
Die gesegde wat sê: "A little respect goes a long way”, bly ook maar nou net 'n gesegde totdat ons begin om "to teach and show them how to respect others and oneself"!
Dit moet by die huis begin en nie verwag word dat hulle dit self moet aanleer of aan ander oorlaat om dit vir hulle te leer nie.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
