Insake: Maak 16 Desember ’n biddag
“Agri SA het ’n beroep op alle kerklike denominasies gedoen om Sondag, 16 Desember as ’n nasionale biddag te gebruik waar vir ’n geweldvrye samelewing én vir die ANC se besluite by die Mangaung-konferensie gebid word. Johannes Möller, president, het die versoek gerig dat Versoeningsdag ’n dieper rol moet speel waar vir versoening en vreedsame naasbestaan gebid word.”
Ek is in my wese teleurgesteld oor ‘n uitspraak soos die. Ek weet nie eers waar om te begin nie. U, as president van Agri SA is die man wat aangestel is om die belange van die boere te verteenwoordig. U is ‘n gesiene man onder baie... Maar ‘n uitspraak soos die is belaglik!
Kom ons praat oor 16 Desember. Dit is reeds ‘n biddag. Dit is Geloftedag. Dit is ‘n dankdag! Ek het op die plaas groot geword en het self geboer totdat ek nie meer kon byhou nie. Sestien Desember was gevier deur die boere as Geloftedag. Dit was deel van ons identiteit. Nou kom u met hierdie belaglike versoeningsgedagte na die boere toe.
Met alle respek, is u dan blind? Sien u nie die nood raak van die mense wat u verteenwoordig nie? As u die mense wil help, herinner hulle aan hulle Gelofte met die Vader eerder as om op hulle gevoelens te speel om hulle erfenis te verraai! Hoe kan jy ons erfenis so eenvoudig verdraai?
Boere is besig om die stryd te verloor. Jammer, maar organisasies soos Agri SA is te blameer. Julle ruggraat is opgevou en word onder die bed weggesteek. Elke keer is dit hierdie kompromie, daardie samewerkingsooreenkoms en aanvaarding van nog laste op ons boere, maar ons sien julle nooit baklei nie?
Hoekom kan julle nie ook aksies reël soos Cosatu om sigbaar te word nie? Hoekom kan ons nie 30 000 liter melk gaan uispuit in die rolspelers se kantore wat dink dit is regverdig om ‘n melkboer R3 per liter te betaal nie? Hoekom kan ons nie soos boere in Europa trokke aan die brand steek met ingevoerde goedkoop vleis nie?
Julle gee julle self uit as die mense wat omsien na die boere, maar dit is tyd om te besef die omstandighede het verander. Al wat julle doen is om die boere se ruggies te vryf terwyl hulle nog bietjie agteroor moet buig!
As mens kyk na die omstandighede waarin ons boere moet oorleef is dit nag! Elke dag is daar nog ‘n boer wat ‘n paaiement agter raak...
Julle fokus op die handjievol ouens wat nog groot en sterk is terwyl die gewone boer tot niet gaan. Ek weet, want ek is een van die 80 000 blanke boere wat in die laaste 20 jaar van die plase af is.
Ek vra u... nee ek smeek by u, ter wille van die boere... Vra dat die boere hulle Gelofte moet nakom eerder as hierdie voorgestelde biddag.
Jy kan enige ander dag gebruik om jou idee te promoveer, maar 16 Desember is Geloftedag... Dit is ons erfenis. Moenie blind wees vir dit wat belangrik is nie. As u bereid is om ‘n biddag uit te roep, neem ek aan u glo in God.
As u in God glo, pleit ek by u, laat hierdie manne en vroue hulle verpligtinge teenoor God nakom...
Moenie ons van ons erfenis ontneem nie...
Met liefde,
Boere-groete,
Johan van der Merwe
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
