Volgende jaar sal ek baie vroeër my Kerfees-inkopies moet doen, want winkelsentrums is deesdae propvol en indien jy wel by een inkom, is al die goeie goed reeds uitverkoop!
Hoe kry mense dit reg om steeds soveel geld te spandeer in hierdie druk ekonomiese tye? Ek sal vir jou sê, hulle het eerder 'n groot bonus ontvang of hulle druk hulself dieper in die skuld. Ek hoop regtig nie dis laasgenoemde nie.
Ek was oor die naweek in 'n gewilde groothandelaar in Kaapstad en dit was vir my verstommend hoeveel geld mense op hulself en ander spandeer. Van plasma-TV's tot speelgoed vir al die familie-kinders, alles vlieg van die rakke af.
Moenie eens praat oor die kos nie! Dis net skaapboud, soutvleis, kalkoen, gammon in al wat 'n waentjie is.
Daar is wel diegene wat vir die Kersgety voorberei. Hulle spaar reeds sedert die begin van die jaar om genoeg te hê om hul benodighede te dek, maar ek's bevrees baie van ons word oor hierdie tyd van die jaar dieper in die skuld gedompel, net om teen middel Januarie platsak te wees en dan weer skuld maak om die maand te oorleef.
My hoop is dat ons denkwyse verander – mens kan eenvoudig nie meer bekostig om oor die vakansietyd geld te blaas op lekkernye en duur geskenke nie.
'n Geseënde Kersfees is inderdaad een waar daar geen finansiële verdriet is nie.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
