Ek wil nie kla nie.
Gemeet teen die gemiddelde persoon gaan dit bitter goed met my. So as ek kla, sal dit met die witbrood onder die arm wees.
Ek kry egter 'n beklemming om my hart as ek ervaar hoe ons burgery (veral die middelklas) op elke denkbare manier belas en behef word. Die staat, plaaslike owerhede en groot besighede is besig om ons te verarm om elke hoek en draai.
As teenprestasie vir my belasting verwag ek van die staat om verantwoordelik met my (ons) bloedgeld om te gaan. Dit is seker nie 'n onredelike verwagting nie.
Ek, soos die meeste middelklasmense (so vermoed ek in elk geval) ontduik nie belasting nie. Behalwe dat die wet dit vereis, is dit ook ons manier om te help bou aan ons land se toekoms (infrastruktuur), om ons landsburgers wat dit nie te breed het nie te ondersteun (hospitale, klinieke en skole) en om die onregte van die verlede oor tyd uit te wis (toelaes, behuising).
Ek raak egter bietjie g*tvol as ek sien hoe die onbevoegde kaders ons geld mors. Vir die eerste keer in my lewe ervaar ek 'n bitterheid rondom die hele kwessie van belasting.
Munisipale belastings en -kostes: dit kos my ongeveer R1 500 per maand om in my eie huis te bly. Erfbelasting! Vir wat? Dis my huis op my erf. Het ek nie reeds hereregte betaal om dit my eiendom te maak nie?
Water, riool en elektrisiteit. As daar nou al ooit 'n verneukery was... Verlede maand se "geskatte lesings" was letterlik dubbel die normale tarief. Hierdie maand sou mens verwag dat dit reggestel word met die werklike lesing. Toe nie.
Om te probeer praat met die mense is natuurlik 'n futiele oefening. Gesigloos. Arrogant. Onbeholpe.
Maar dis natuurlik nie net ons regeringstrukture wat ons roof nie.
Ek het presies vir 26 ure parkeer by die Kaapstad-lughawe die week. R225!
Die ekstra boks wat moes saamvlieg vanaf Johannesburg? R350. Ek het met die gaan net handbagsie gehad, maar moes op kort kennisgewing twee bokse afbring Kaap toe. Die gesamentlike gewig van die twee bokse was 10 kg. Die nuwe beleid is blykbaar een item onder 20 kg.
Selfoonnetwerke waar drie uit 10 oproepe net eenvoudig faal? Banke. Versekeraars. Privaathospitale.
En so kan ek aangaan.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
