Die berig 'Toegewyde Christen' moet hoes oor affair’ verwys:
Met verbasing het ek gelees dat 'n regter 'n man verantwoordelik gehou het vir die opbreek van 'n huwelik. Nou ja, sonder AL die feite gaan dit maar moeilik wees om dit te verstaan.
Wat van die vrou? Gaan sy nou skotvry hiervan afkom? As hulle huwelik dan so ‘gelukkig’ was, hoekom die nodigheid om haar man te los? Dit is mos nie asof sy NIE vrywillig deelgeneem het aan die affair nie. Sonder haar vrywillige deelname sou daar in die eerste plek nie 'n affair gewees het nie.
Ek het al baie gesien hoe die manne hulle vrouens behandel. Daar word op hulle geskreeu, hulle word aangerand, sielkundig en emosioneel afgetakel en hulle word boonop somtyds voor ander mense verkleineer. Ek het al gehoor hoe vrouens verskreeu word as hulle die man bel om ‘advies’ te kry.
Dalk moet die manne maar net leer dat vrouens nie hulle 'besittings' is nie en as jy hulle nie goed behandel nie, dan kan jy maar jou geld daarop sit dat daar wel iemand anders is wat hulle goed sal behandel. Dus, as jy nie wil hê jou vrou moet 'n affair aanknoop nie, maak seker JY is die een wat haar die beste behandel en waardeer en ek praat nie van ‘omkoop’ met geskenke en geld nie.
Snaaks hoe baie van hierdie mans ’n ‘front’ voorhou dat alles goed gaan in hulle lewens terwyl jy die hartseer en vrees in die vrouens se oë kan sien.
Hierdie saak is maar net 'n 'ego' wat 'n pleistertjie moes kry en die regstelsel is hiervoor uitgebuit. Die probleem hier is dat die manne tegnies goedkeuring gekry het om vrouens as hulle besittings te beskou.
Mense het keuses in die lewe en as jy kies om by iemand anders te wees, dan is dit mos jou eie keuse.
‘n Ander ding wat nou kan kop uitsteek is dat mans nou ‘geframe’ kan word om geld te kan maak. Dit begin al hoe moeiliker word om mense te vertrou.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
