Ek wou eers hierdie skrywe rig aan die minister van arbeid, maar ongelukkig is dit so dat ministers en presidente gewoonlik nie ‘n té lang raklewe het nie.
Vir groter permanensie wil ek liewer graag die ANC met goeie raad bedien, soos in die woorde van Profeet Zuma: Die ANC sal regeer tot Jesus kom!
ANC, om mense se lone vas te stel op R69 per dag terwyl julle self in die uiterste weelde leef was absoluut onverantwoordelik, om dit sagkens te stel. Dit verg nie ‘n siener om te voorspel dat so ‘n karigheid teen die agtergrond van ewigdurende prysstygings ‘n oorvloed plofbare materiaal sou verskaf aan die stoompot wat uiteindelik sy deksel afgeskiet het nie.
Toe begaan julle volgens my ‘n nog groter mistasting, deur die minimum loon vir plaasarbeiders te gaan vaspen op R105, weereens sonder enige voorgevoel vir wat die gevolge daarvan kan wees. Volgens my gaan hierdie verhoging:
- Baie marginale boere uit die besigheid dryf wat
- Boere sowel as arbeiders werkloos gaan laat.
- Groter boere gaan verplig om meer te meganiseer wat
-Tot meer werkloosheid gaan bydra.
- Voedselpryse gaan noodwendig die hoogte inskiet wat
- Inflasie gaan laat styg en
- Die voedsel in- en uitvoermarkte nadelig gaan affekteer.
- Boere en werkers verder van mekaar vervreem.
- En... en... en...
En dis nie al nie! Hoe dink julle, vir hoe lank gaan die arbeiders tevrede wees met hierdie R105? Of gaan julle maar rustig wag tot die pap-pot weer oorkook?
Een van die hoof prioriteite vir julle, die ANC, is om werk te skep vir die massas en met hierdie landbou-onrus moes julle die wegholperd aan die teuels gegryp en tot bedaring gebring het. En dit is glad nie so moeilik soos wat dit op die oog af lyk nie.
Julle moet die boere ‘n aansporing gegee het om liewers meer mense in diens te neem, as andersom. Dit sou julle waaragtiglik reggekry het indien julle die boere sou vra om net ‘n minimale verhoging van R6 tot die minimum loon by te dra om dit te neem tot by R75. Maar hier kom die kinkel in die kabel...
Die regering moet dan self ook verantwoordelikheid neem en die boere ewenaar rand vir rand om die minimum loon vir plaaswerkers so op te stoot na die R150 waarvoor hulle gevra het. Die plaaswerkers is die mense wat met hul loon moet leef en hulle weet wat hulle nodig het.
Dan moet dit gesorg word dat daardie loon tred hou met die inflasie-koers. Daar moet gesorg word dat die plaaswerkers almal gedek is met werkloosheidsversekering en dat hulle gesondheidsorg kry. Die boere moet die vergoeding aanpas van die werkers wat uit die ongeskoolde fase tree of sekere doelwitte oorskry.
En asseblief ANC, moenie julle asems intrek en “ONBEKOSTIGBAAR!” skree nie, want dit sou ‘n leuen wees en ek glo nie die ANC sal graag wil gebrandmerk word as leuenaars nie. Vir elke miljoen werkers wat op hierdie manier in diens geneem word sal dit die regering ongeveer R18000miljoen wel-besteë rande kos. Dis net ‘n kwessie van strenger fiskale waghouding en toesien dat die land se bates nie verspil word nie en dat korrupsie met hand en tand beveg word en siedaar...!
En hier kom die pluspunte. Volgens my oordeel sal so ‘n stap:
- Marginale en beginner boere ‘n hupstoot gee en aanspoor tot groter hoogtes.
- Boere gaan aanmoedig om meer arbeidsintensief te boer.
- Baie werklose ongeskooldes na die plase lok
- En werkloosheid, veral in die platteland, vir ‘n ses slaan.
- Voedselpryse sal stabiliseer wat
- Inflasie in toom sal hou.
- Die SA boere kry nou ‘n broodnodige boerdery subsidie wat
- Hulle kompeterend maak internasionaal.
- Die verhouding tussen boere en werkers sal normaliseer.
- En... en...en..
En dis nie al nie. Ek is oortuig dat hoe kleiner die werkloosheidssyfer is, hoe kleiner sal die misdaadsyfer word, want die duiwel weet hoe om ‘n goeie oorkussing te wees vir ledigheid. ‘n Stap soos hierdie sal ‘n positiewe invloed hê op al die ander sfere van regering en dit op sy beurt sal al hoe meer kiesers van alle bevolkingsgroepe oortuig dat die ANC werklik die mense kan bevry van baie meer as net armoede.
Dink net daaraan ANC, niks sal meer vir julle onmoontlik wees nie. Die Wes-Kaap sal soos ‘n ryp appel in jul skoot val en wie weet, dalk word Profeet Zuma se voorspelling nog waar: “Die ANC sal regeer tot Jesus kom!”
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
