Die ou vyand, Nieu-Seeland het die afgelope naweek met die louere weggestap by die Suid-Afrikaanse been van die internasionale sewestoernooi in Port Elizabeth.
Die Blitsbokke moes maar tevrede met derde plek wees nadat hulle teen die All Blacks in die stof gebyt het.
Maar die Blitsbokke se vertoning was nie die mees teleurstellende ding by die toernooi nie. Dit was sonder twyfel die leë Nelson Mandelabaai-stadion.
Ek weet nie of dit bloot net 'n gebrek aan belangstelling is, of kaartjiepryse is nie.
Persoonlik dink ek die kaartjies is te duur. Sewesrugby se gewildheid het sonder twyfel oor die afgelope paar jaar skerp toegeneem, maar is dit regtig nodig om tussen R80 - R200 per kaartjie (afhangend of dit vir eendag of twee dae is) te vra? G'n wonder die stadion was so leeg nie.
Ek dink die organiseerders kon baie meer mense by die stadion ingekry het as hulle tussen R30 en R50 per kaartjie gevra het. Dit lyk miskien na 'n weggee-prys, maar ten minste sou daar meer mense gewees het wat oor die twee dae baie geld op drankies en kos spandeer het.
Dis briljant om rugby na sogenaamde agtergeblewe gebiede te neem, maar maak dit dan bekostigbaar vir die mense van daardie gebied om ook die sport te geniet.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
