Die ou sinnetjie is nou al so holrug gery: "Julle onderwysers kry te veel vakansies en sit heeldag voor die klas en les gee"!
Kom ons klaar die storie eens en vir altyd op: onderwysers is meer as geregtig op die vakansies en 'n onderwyser wat in die tyd en eeu nog voor by sy tafel sit en les gee is die uitsondering op die reël.
Om geestelik, emosioneel en "breinmoeg" te wees, is duisend maal erger as om fisies moeg te wees!
Die gewone klerk/ werker kom vanoggend by sy of haar werk aan, skakel die rekenaar aan en begin waar hy/ sy gister opgehou het. Vanmiddag met uitskeityd word die rekenaar afgeskakel, die pik en graaf word net daar gelos; soms word daar nie eers twee keer gedink om dit weg te pak nie, die voertuig word geparkeer na aflewerings ens. en sleutels opgehang.
By die huis gekom, word die skoene uitgeskop, neergeplak voor die TV of daar word begin met die gunsteling aktiwiteit of tydverdryf tot en met etenstyd. Hoeveel van die werk het saam huistoe gekom en hoeveel tyd word na werksure daaraan bestee?
Onderwysers daarenteen begin die dag as dit "normaal" is met ouers te woord staan omdat Jannie die vorige dag "anders as eenders" wou wees of omdat daar 'n "krisis" by die huis was en meneer/ juffrou kan dit moontlik help oplos; die amptelike skooldag het nog nie eers begin nie!
Onderwysers wat moontlik nie vir werk gaan aanmeld nie en reëlings moet getref word vir diesulkes se klasse; amptelike skooldag begin eindelik en voor jy ordentlik aan die gang is, is dit tyd om te ruil want die periode(s) is verstreke en nou moet na die volgende klas(se) geruil word.
Tussendeur is daar versoeke en oproepe na en van die kantoor en ander klasse/ kollegas wat hulp/ leiding nodig het. Boek word gehou van gelde ingesamel, vergaderings en werkswinkels bywoon, sport-en kultuurbyeenkomste en pouses aanmeld vir terreindiens en of by die snoepwinkel diens doen.
Na skool is daar detensieklasse, sport en ander wedstryde hanteer en bywoon, behalwe vak- en graadvergaderings! Wanneer die onderwyser uiteindelik huiswaarts keer, is dit met stapels boeke wat gemerk en nagegaan moet word, voorbereiding vir môre se lesse, administratiewe werk wat nie by die skool afgehandel kon word nie en intussen kan nie bekostig word om verpligtinge op die tuisfront af te skeep of agter te laat nie.
Teen hierdie tyd droom die meneer/ dame wat onderwysers uitkryt van "te veel vakansies en by die tafel sit en les gee" seker sy vyfde droom en die onderwyser wat nog "ou nag" by die "vetkers" sit en swoeg om van Jannie 'n "aanvaarbare burger" vir die land te probeer maak.
So, meneer/ dame, maak daardie stellings as u bereid is om vir een kwartaal plekke met 'n onderwyser te ruil.
Sal u dan nog dieselfde deuntjie sing: "Julle kry te veel vakansies...".
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
