Dit bekommer my werklik om te sien hoe min Afrikaanse mense omgee vir wat in die VSA en Europa gebeur.
Is ons nie besig om ook maar soos die Amerikaners te word nie, wat 'n baie nou uitkyk op die lewe het?
'n Mens kan nog verstaan as Afrikaners nie veel aandag skenk aan die Europese finansiële krisis nie – dis immers ingewikkeld en kan nogal moeilik wees om te verstaan.
Maar wat van die Amerikaanse presidentsverkiesing op die oomblik? Hoekom is daar so min Afrikaners wat dit met belangstelling volg?
Natuurlik is daar 'n paar wat wel daarin belang stel, maar heeltemal te min mense dra kennis van wat aan die gebeur is in een van die grootste moondhede op aarde.
In die afgelope paar maande het ek al heelwat meningspeilings gesien oor mense se opinie van die verskillende kandidate en die verwikkelings in Amerika. Maar elke keer kies die meerderheid Afrikaanse mense die opsie "Ek gee nie om nie". So asof hulle nie kan of wil omgee vir wat in die wêreld om hulle aangaan nie. Jy kan dit ook sien aan die stories wat gelees word – stories oor plaaslike kunstenaars word veel meer gelees as belangrike stories oor internasionale politiek.
Ons Afrikaners is 'n trotse nasie met meer invloed as wat ons soms besef. Maar ons het so geword omdat ons altyd belang gestel het in wat in die wêreld gebeur. Ons het nog altyd omgegee vir kennis. Ons het ook nog altyd besef dit wat in die VSA gebeur kan 'n massiewe impak hê op ons en die res van die wêreld.
Wat het nou gebeur? Hoekom is so baie Afrikaners trots op die feit dat hulle nie weet wat in die wêreld gebeur nie?
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
