Dit is veronderstel om vakansie te wees: luilekker-dae van verwyl met die gunsteling tydverdrywe.
Ai, dis wat jy dink, meneer!
Vroulief sit oorkant jou en jy kan sien dat sy sit en dink aan dinge wat gedoen moet word. Dit lyk kompleet asof sy dit nie kan verdra dat jy so ledig sit nie: die gras makeer 'n sny, 'n muurtjie of vertrek moet weer 'n bietjie geverf word, die tuin lyk soos 'n woesteny volgens haar, ens.
Wil jy nie 'n bietjie help met die stryk-en wasgoed nie? Hoe lyk die rok aan my? Gevaarwater!
Sê liewer niks of dat alles haar laat lyk soos op julle troudag om weg te kom van die turksvy.
Gaan ons bietjie inkopies saamdoen, is dit 'n gedoente van 'n ander wêreld: die een produk word bekyk en net weer teruggeplaas in die rak, want sy het 'n soortgelyke produk op 'n ander rak gesien.
Terug na die rak en die produk word weer van voor af beskou en beloer en weer teruggesit; gaan haal maar die eerste een want iets het nie so lekker gelyk of gevoel aan die tweede produk nie.
In die motor is dit weer 'n gekners van tande: jy kyk nie lank genoeg links of regs nie, jy word gewaarsku teen motors, voetgangers en fietsryers wat nog kilometers ver van julle af is.
Verkies jy om by die gewone parkeer-area te gaan parkeer, word daar sterk beveel dat die onderdak-parkering beter is en net die vorige keer was die onderdak-parkering vol gevare en booswigte wat jou voorgelê het en diesmeer!
Jy word gevra wat jy vir ete wil hê: vleis, vis, hoender of wat ookal, vra maar vir die teenoorgestelde as wat jy graag wil hê!
Die sigaretrook maak haar klaar; maar voor jy jou kom kry, skuif sy ewe lieftallig hier langs jou in, waar jy jou dampie in vrede neem; net om vir jou te sê: "Jy rook te veel! Is die vensters oop en sit die waaier aan."
As jy die vensters oopmaak, vee of die skottelgoed was, word jy summier daar regggewys: "So doen 'n mens dit!"
Enige dingetjie wat jy doen, kom sy agterna en doen maar haar verstellinkie(-s), soos sy dit wil hê! Dis waarom ek soms dink: "What makes a woman tick?", want na 26 jaar se getroude lewe is ek nogsteeds "clueless"!
Maar vir haar verruil ek vir g'n ander nie; ek het mos gesê: "I do... and for better or worse...!"
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
