Dit wil voorkom of Suid-Afrikaners toenemend begin aanvaar dat hulle in 'n kleptokrasie leef, waar politici hulleself en hulle families dien, eerder as die land.
As dit nie reeds die geval is nie, is dit beslis die indruk wat geskep word.
Wanneer hooggeplaastes soos pres. Zuma daarvan beskuldig word dat hy homself verryk met staatsgeld (met verwysing na die Nkandla-sage), en hy gee nie regtig daarop antwoorde nie, is dit immers al afleiding wat die gewone man op straat kan maak.
Die ware feite (as dit verskil van wat deur die media voorgehou word) maak nie eers regtig saak nie. Die probleem is dat Zuma en sy vriende die indruk skep dat hulle 'n kleptokrasie bedryf, en eenvoudig nie die teendeel kan of wil bewys nie. Wanneer antwoorde geëis word, word die skouers opgetrek, of vae verduidelikings word gegee wat nie werklik die vrae beantwoord nie.
Wat ek probeer sê, is dat die groot probleem nie regtig is of Nkandla deur Zuma betaal is of nie. Hy het heel waarskynlik vir minstens 'n deel daarvan betaal (die besonderhede oor waar die geld oral vandaan kom wil ek eintlik nie eers hoor nie!).
Die werklike probleem kom in by Zuma se reaksie op die sage: die feit dat dit lyk of hy eenvoudig nie genoeg omgee om duidelik te stel of hy belastinggeld misbruik het of nie. Zuma se houding sê vir my, 'n gewone Suid-Afrikaner, dat hy nie werklik omgee wat ek dink nie - dat ek eenvoudig moet aanvaar dat hy in 'n magsposisie is, en sulke soort goed kan doen.
Dus: die groot probleem is die kwessie van verantwoording. Een van die kenmerkende eienskappe van 'n kleptokrasie is dat leiers nie tot verantwoording geroep kan (of wil) word nie.
As dít die waarheid is, leef ons inderdaad in 'n kleptokrasie.
Kan dit só moeilik wees om duidelike, eerlike antwoorde te gee oor staatsbesteding wanneer die grootste deel van die land in armoede leef?
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
