Die tragiese dood van die fietsrykampioen Burry Stander laat 'n mens opnuut met groot kommer oor padveiligheid in Suid-Afrika.
Volgens berigte is Stander vermoedelik deur 'n taxi doodgery – iets wat ongelukkig glad nie verbasend is nie.
Die natuurlike neiging is natuurlik om dadelik die vinger na taxibestuurders te wys en hulle die skuld te gee vir die anargie op die land se paaie. Op 'n manier is dit natuurlik net geregverdig – taxibestuurders verontagsaam die padreëls gedurig op die vreeslikste maniere.
Maar ek glo daar is 'n dieper kwessie ter sprake. Ek dink die ware probleem lê by die nie-konsekwente manier waarop die wet toegepas word. Die wáre probleem lê by die verkeersowerhede, wat ondoeltreffend is, en die wet oneweredig toepas.
Taxibestuurders is bloot die groep met die grootste motivering om die wet te oortree. Hulle is gereelde padgebruikers, en het 'n finansiële motief om so vinnig as moontlik by hulle bestemming uit te kom.
Die probleem is egter dat wetstoepassing van een dorp of stad na die ander heeltemal verskil. In Johannesburg kan jy doen wat jy wil. Ry jy egter deur 'n dorpie soos Ventersdorp, wag daar vir jou tien boetes wanneer jy by die huis kom. In een dorp kan jy bestuur nes jy wil; in 'n ander word jy met 'n ystervuis platgedruk. Die gevolg is dat mense weet waar en wanneer hulle die wet kan oortree, en dit dan doen wanneer hulle die geleentheid en motivering het.
Die groot probleem met die anargie op ons paaie lê nie by die taxi's self nie (hoewel hulle 'n groot deel van die probleem is). Die groot probleem lê by die absoluut hopelose en hulpelose manier waarop ons verkeersowerhede voortploeter. Hoekom kan 'n gewone landsburger sien dis nodig om die wet in 'n spesifieke gebied strenger toe te pas, maar diegene wie se werk dit is om dit te doen, is nêrens te vinde nie, of sien dit nie raak nie?
Die hartseerste saak van alles is dat hierdie stand van sake op soveel ander gebiede en maniere in ons land gerepliseer word.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
