Taal word nie voldoende beskerm
deur Matt Heyns
2010-09-01 07:43
Waarom is moedertaalskole van kardinale belang?
Afrikaanse moedertaalskole geniet nie die gewenste beskerming nie. ‘n Meertalige samelewing verwag van n grondwet om voldoende beskerming te bied. Die huidige ideologiese beleid van verengelsing is baie meer nadelig vir Afrikaans as wat Milner ooit van kon droom en rig afskuwelike skade aan 'n moderne pragtige en kragtige taal.
Miskien is daar onsekerheid oor die begrippe moedertaalonderrig en moedertaalskole. Diegene wat by die grondwetlike onderhandelings betrokke was het te kenne gegee dat moedertaalonderrig Afrikaanse onderrig sou beveilig. Hierdie siening was egter erg misleidend.
Moedertaalonderrig sal moontlik wees al bly daar nie een Afrikaanse skool oor nie.
Moedertaalonderrig is nie waaroor dit gaan nie. Moedertaalskole, met 'n bepaalde etos en karakter, wat nie behoue bly nie, is die doring in die vlees van minderhede. Die sogenaamde wigte en teenwigte, waarmee die onbeholpe onderkonkelaars so gespog het, het toe nooit n werklikheid geword nie. Hierdie versuim grens aan 'n kriminele oortreding. Sommige noem dit n ernstige flater of mistasting.
‘n Beduidende aantal Afrikaanse skole is alreeds gedwing om parallel- of dubbelmedium-skole te word. Al hoe meer sal heelwaarskynlik hulle voorbeelde moet volg. Die skade wat berokken word is hartverskeurend. Is daar dalk 'n Afrikaanse kultuurliggaam wat dit nodig ag om 'n omvattende opname van hierdie skade te onderneem.
Die woorde van Bertus de Villiers, wat by die grondwetskrywende proses betrokke was, “Ons het in hierdie grondwet ons bes vir Afrikaans gedoen. Ons het nie 'n slegte ooreenkoms gekry nie,” laat 'n mens opnuut wonder hoeveel ander onbeholpe onderkonkelaars by die skrywe van die finale grondwet vir SA betrokke was. Blykbaar het net die ANC , na die Notule Van Verstandhouding onderteken is, die grondwet voltooi soos dit hulle pas.
Reg van die begin af was dit duidelik dat die howe hierdie betrokke artikel anders vertolk. Skole is eenvoudig toegelaat om net Engels te gebruik. Daarna het die staatsdiens feitlik in sy geheel oornag na Engels oorgeslaan. Maar hef aan lê nog voor.
Gaan die US nou met studente gevoer word wat hoiti toiti Afrikaans as ‘n vak geslaag het in graad 12? Maar hoiti toiti Afrikaans klink darem beter as die hoiti toiti Engels wat nou mode is!
Word gepubliseer op MyNuus24 deur jou storie, brief of rubriek aan ons te stuur.
Stuur jou nuusfoto's
Neem kennis: Alle artikels en briewe wat op MyNuus24 gepubliseer word is geskryf deur onafhanklike lede van die Nuus24-gemeenskap. Die sienings van gebruikers wat op Nuus24 gepubliseer word verteenwoordig dus dié van die individue self, en is nie noodwendig die sienings van Nuus24 nie. Nuus24 se redakteurs behou ook die reg voor om enige kommentaar wat ontvang word te redigeer of af te keur.