'n Mens wil graag aan die einde van 'n jaar terugkyk op gebeure en die positiewe aspekte uitlig. Tog is dit ná 2012 besonder moeilik om te doen.
Natuurlik is daar elke jaar negatiewe aspekte, en geen jaar is perfek nie, maar dit voel tog of hierdie jaar selfs moeiliker as ander was.
Op internasionale vlak het besparingsmaatreëls in Europa groot paniek veroorsaak en hoewel ons in Suid-Afrika nie te erg daardeur geraak is nie (nóg nie), het dit tog bygedra tot 'n mate van spanning.
Dié probleme ver van die huis af lyk egter klein wanneer dit vergelyk word met die probleme wat ons op 'n alledaagse basis raak.
Op onderwys-gebied dink 'n mens aan die fiasko wat met die handboekkrisis in Limpopo gepaard gegaan het. Ook die uitslag van 'n studie wat getoon het dat wiskunde- en wetenskaponderrig in Suid-Afrika onder die swakste in die wêreld is, het groot onrustigheid veroorsaak.
Dié spesifieke probleme is vir my veel erger as die ander, omdat dit nie net nou 'n impak op ons land het nie, maar ook groot vrae laat ontstaan oor die toekoms. Wanneer dit is hoe ons onderwysstelsel lyk, begin 'n mens baie bekommerd raak oor die toekoms van 'n land soos ons s'n in 'n wêreld waar alle spelers net meer mededingend word.
Gepraat van mededingend: 2012 sal ook onthou word as die jaar waarin Suid-Afrika se mededingendheid aansienlik gedaal word, veral in terme van ons arbeidsmark. Groot arbeidsonrus (soos by Marikana en onder plaaswerkers in De Doorns) het gewys dat die jaarlikse stakings deur werkers oral die volgende vlak bereik het, waar geweld en lewensverlies nie meer vreemd is nie. Intussen word ons al hoe minder mededingend – tot op die punt waar mynmaatskappye nou weer kyk na platinumproduksie in Zimbabwe, eerder as hier, waar werkers minder wil werk, vir meer geld.
Tesame hiermee was die Nkandla-sage ook 'n skerp herinnering dat diegene met mag nie noodwendig omgee wat met die armes gebeur nie, solank hulle vir hulself kan sorg.
Ek wil nie klink soos die ewige pessimis nie, want daar is heelwat om voor dankbaar te wees. Maar dis die bogenoemde faktore wat my regtig bekommerd maak oor die toekoms. Ek hoop dat ek nie oor vyf jaar sal terugkyk na 2012 as die jaar waar alles lelik begin skeefloop het nie.
Kom ons hoop dis ná 2013 makliker om die positiewe aspekte te identifiseer.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
