Ek dink nie daar is 'n enkele mens op aarde wat nié die nuus oor Oscar Pistorius die laaste week of wat gevolg het nie.
Behalwe vir die nuus wat oral op koerante se voorblaaie te sien was, het televisiekameras en tydskrifte ook seker gemaak geen storie oor Oscar gaan verlore nie. Daarbenewens was daar ook sosiale media, waar elke liewe verwikkeling in die Pistorius-sage brokkie vir brokkie met die wêreld gedeel is.
Nuusvrate het die afgelope paar dae werklik genoeg gekry om al hulle nuuskierigheid te stil.
Maar iewers moet dié storie tot 'n einde kom.
Ek sien die laaste dag of twee 'n ontstellende tendens: Die media begin al hoe meer na grashalms gryp om lesers se honger vir Oscar-stories te stil, en in die proses word daar dieper gedelf as wat werklik nodig is.
Daar is byvoorbeeld die laaste twee dae onthullings oor Oscar se broer, gerugte oor 'n seksmiddel vir Oscar, en meer besonderhede oor Reeva se lewe.
'n Mens wonder hoe lank dit gaan neem voor die media ook geraamtes uit die onderskeie families se kaste gaan krap. Dit kom nog – wag maar net.
Ek is net so dankbaar soos enigiemand anders dat die media ons op hoogte hou oor sulke belangrike nuus, maar genoeg is genoeg. Lig ons in oor die feite, en moenie probeer om elke sensasionele storie na te jaag nie.
Kom ons gee Oscar en sy familie, sowel as Reeva se familie, 'n kans om hierdie tragedie te verwerk.
En kom ons vra ons joernaliste om hierdie saak met 'n sin van verantwoordelikheid te dek.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
