Ek het met groot belangstelling gekyk na die video oor mynwerkers wat vra dat 'n nuwe party gestig word wat na hulle belange sal omsien.
'n Mens kan nie anders as om jammer te voel vir hierdie mense nie, wat in 1994 met soveel hoop gedink het dat iemand uiteindelik vir hulle vir 'n beter lewe gaan sorg.
Die realiteit is natuurlik anders: Suid-Afrika se regering het, net soos in vele Afrika-lande, 'n regering geword wat net homself dien.
Tog wil ek iets sê oor die mynwerkers se hoop op 'n nuwe party. Ek dink nie 'n nuwe party is die oplossing nie. Die probleem is nie om 'n ander party in te stem nie – die werklike probleem is die ingesteldheid van die mense wat die land lei.
Ek vind dit bitter, bitter moeilik om aan 'n enkele politieke leier te dink wat in die politieke spel is om iets vir sy land te beteken. Miskien is daar een of twee, maar die meerderheid Suid-Afrikaanse politici is bloot daar om 'n salaristjek te verdien en om die soustrein te ry.
As jy dink dit gaan verander net omdat daar 'n "ander party" aan bewind is, maak jy 'n groot fout. Ek dink die vorming van Cope en al die gebeuere rondom die party is 'n goeie voorbeeld van wat ons te wagte kan wees.
Verandering – ware verandering – begin by individue. Dit begin by die opheffing van 'n nuwe klas leiers wat binne die raamwerk van 'n funksionerende staat opstaan om hulle mense te dien. Sulke leiers word nie oornag geskep nie – hulle is die produk van 'n baie, baie lang vormingsproses van jare en jare.
Het ons sulke leiers in Suid-Afrika? Ek is bevrees nie.
Nuwe party of geen nuwe party, die probleem bly dieselfde: Ons het 'n selfsugtige nasie geword vol opportuniste wat net daarop uit is om hulleself te dien.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
