Nuus24 se kommentaarbeleid
deur MyNuus24-redakteur
2012-02-07 09:18
Nuus24 en die res van ons netwerk het 'n paar maande gelede oorgeskakel na 'n nuwe Facebook-kommentaarstelsel, wat effektief beteken lesers kan net kommentaar lewer op artikels deur 'n Facebook-profiel.
Ons het die laaste paar jaar met 'n verskeidenheid formate vir ons kommentaarfasiliteit eksperimenteer. Eers het ons 'n modereringstelsel gebruik, maar dit het kommentaar en interaksie teruggehou – en dié interaksie is immers een van ons hoofprioriteite.
In 2010 het ons na 'n gemeenskapsmodereringstelsel oorgeskakel, wat gebruikers in staat stel om dadelik kommentaar vir verwydering te rapporteer. Gebruikers kan dit doen deur op die "Rapporteer"-skakel langs elke kommentaar te kliek. Dit stel ons in kennis van die kommentaar, en laat ons toe om dit te verwyder as dit nie met ons beleid ooreenstem nie. Die krag lê dus in ons gebruikers se hande om kommentaar te rapporteer en gebruikers wat die fasiliteit misbruik van ons webwerf te verwyder.
Ons het dit goedgedink om weer ons kommentaarbeleid te beklemtoon, om te verseker dat ons lesers daarvan bewus is.
Nuus24-kommentaarbeleid:
– Die doel van Nuus24 se kommentaarfasiliteit is om oop besprekings van aktuele sake vir ons gebruikersgemeenskap moontlik te maak. Kommentaar wat nie tot dié doel bydra nie, of wat duidelik nie met ‘n artikel verband hou nie, kan verwyder word.
– Geen persoonlike aanvalle op ander gebruikers sal toegelaat word nie. Gebruikers wat hulle herhaaldelik aan dié soort gedrag skuldig maak se gebruikersrekeninge sal gekanselleer word.
– Haatspraak en kommentaar wat geweld aanhits word nie toegelaat nie. Dit sluit in rassisme, seksisme, homofobie, anti-Semitisme en enige ander uitspraak wat enige bevolkings- of kulturele groep verkleineer of beledig. Kommentaar met kru of onvanpaste taal of enige vorm van haatspraak sal verwyder word. Gebruikers wat hulle skuldig maak aan haatspraak se gebruikersrekeninge kan gekanselleer word.
– Telefoonnommers, e-pos-addresse en ander privaat inligting sal verwyder word.
– Kommentaar wat skakels bevat na onvanpaste inhoud sal verwyder word. Skakels na persoonlike blogs wat wel verband hou met artikels is toelaatbaar.
Nuus24 onderneem om soos altyd kommentaar wat gerapporteer word binne 12 uur na te gaan. Ons behou egter die reg voor om kommentaar wat gerapporteer is wat wél aan ons kommentaarbeleid voldoen, nie te verwyder nie.
Lesers wat ons kommentaarbeleid herhaaldelik verontagsaam se gebruikersrekeninge sal verwyder word, en hulle sal nie meer in staat wees om kommentaar te lewer nie.
Indien jy enige vrae of voorstelle het, stuur dit aan ons by terugvoer@nuus24.com.