Ek is bevrees ons gaan voor die Mangaung-verkiesingskongres in Desember nog heelwat berigte oor politieke skandale sien.
Dis te verwagte. Soos politici hulle posisioneer vir die regerende party se groot verkiesing, is een van die beste taktieke om te gebruik sekerlik die uitgrawe van 'n politieke opponent se skandes.
Baie mense is in hulle skik daarmee, en voel dat gebeure soos die naweek (byvoorbeeld berigte dat die Zuma-kamp by moontlike afpersery betrokke was), dalk net die ding is om van omstrede figure soos Zuma ontslae te raak.
Veral Afrikaanse lesers is geneig om, sonder om te skroom, hierdie soort berigte te verslind, omdat dit op 'n manier vir hulle die geleentheid gee om aan hulle frustrasies oor die politieke stand van sake uitdrukking te gee.
Tog moet 'n mens versigtig wees. Ek is net soos enigiemand anders bly as beweerde leuens wat voorheen weggesteek is, blootgelê word (maak nie saak wie die politieke figuur is wat daardeur beïnvloed word nie). Maar 'n mens moet ook in gedagte hou dat die meeste van hierdie dinge nie gaan oor die waarheid nie, maar bloot 'n politieke magspel.
Die skandes kom nie uit as gevolg van mense wat wil hê die waarheid moet seëvier nie – dis eerder as gevolg van een kandidaat wat 'n ander een wil verswak. Met ander woorde: Niemand het die belang van die land op die hart nie – almal speel net die skaakspel van mag om hulleself te bevoordeel.
Wanneer iemand op dié manier 'n leier word, kan jy maar seker wees van die feit dat hy net daar is vir homself, en nie tot voordeel van die land nie.
Dis maklik om die een skandaal na die ander na te jaag, maar het jy al vir jouself gevra: Wie sal Zuma vervang as hy nie meer daar is nie? En wie volg weer vir daardie persoon op?
Ek verbly my nie meer oor politieke skandale nie. Ek wil nie deel hê aan daardie politieke magspel nie. Op die ou einde beteken dit net meer korrupsie, bedrog en agterbaksheid.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
