Wel, dit kon nie ’n maklike naweek gewees het as jy ’n stoere Bloubul is nie (ek vryf nie sout in die arme mense se wonde nie. Dit was ook nou nie juis die mees merkwaardigste naweek vir ’n Cheetahs-ondersteuner nie).
Maar die hele ding van Heyneke Meyer het sekere verwagtinge geskep by sekere mense. Die Heyneke-jare was van die beste jare wat Bloubul-ondersteuners ooit beleef het.
Heyneke Meyer is ’n merkwaardige man. Ek dink mens kan redelik onbestrede sê dat dit wat Steve Hofmeyr vir die Bulle op musikale front gedoen het, het Meyer vir die Bulle op die oefenveld en in die spankamer gedoen. Die Bloubulle sou nie presies die Bloubulle gewees het sonder Heyneke Meyer nie.
En ek wil graag bietjie vandag aansluit by Mario Jordaan. Gee die Bokke ruimte sê hy. Ek sê dis nie ’n slegte idee nie.
Toe so baie mense teen Peter de Villiers gedraai het en sy kop geëis het, het ek vir Peter opgekom. En ek dink dit is niks minder as regverdig nie om ook vir Heyneke en sy Bokke op te kom.
’n Mens kan seker, na alles, gaan en sê ja, maar kyk vir Morné Steyn. Hoeveel keer nog moet Morné bewys dat hy nie in vorm is nie? Dat hy nie kan skop nie?! Die feit van die saak is, amper elke afrigter maak soos Heyneke maak. Peter de Villiers het self volstaan met John Smit.
John Smit kon uiteindelik nie eens meer sy provinsie verteenwoordig nie. Maar De Villiers het sy vertroue in Smit geplaas.
En hoe naby het die Bokke nie aan oorwinning gekom in die 2011 Wêreldbeker nie? Ek raai as daar ’n ander skeidsregter daardie dag geblaas het, dan het die beker nou in Suid-Afrika gestaan en Peter de Villiers was almal se held.
Dit is maar net eenvoudig hoe die lewe is. Die beste mense word nie altyd gekies nie. Elke mens het ’n stukkie Quality Street in hom of haar want elke mens het sy of haar ‘favourite’.
Ek dink nie kritiek teen Meyer is onregverdig nie. Meeste mense op aarde ken die gevoel van ‘geweeg en te lig bevind’ (liewe aarde, hoe ken EK nie die gevoel nie?). Ons ken almal daai gevoel van: toe, loop nou maar. Maar kyk mens na die Bokke dan voel dit vir jou daar is sekere mense wat tog met handskoene behandel word.
Maar dinge kan nog lekker uitdraai vir die Bokke. Hulle het eintlik goed gespeel Saterdag en eintlik die wedstryd weggegooi. Dit was nie asof die All Blacks stukke beter was nie. Dit was dom foute van die Bokke.
Die punt wat ek probeer maak is dat elke mens is uniek. En so is elke afrigter uniek. Dit sal nooit weer wees soos onder Peter de Villiers nie. En so sal dit nooit weer wees soos onder Jake White nie. En so kan mens aangaan.
Toe Peter de Villiers destyds bo Heyneke Meyer gekies was as afrigter, was ek een van die baie mense wat ongelukkig was. Maar Peter het, na my beskeie mening, homself bewys as ’n man wat sy unieke en belangrike stempel op situasies kan afdruk.
Ek dink (en hoop van harte dat ek reg is), dat mnr. Meyer ook sy kritici verkeerd sal bewys.
Hierdie is een van Barend van der Merwe se jongste blogs.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
