Ek wil graag aansluit by die brief ‘Fokus eerder op misdaad, armoede’.
Die betrokke geval lyk vir my na niks anders as ’n uitbarsting van fundamentalisme nie. Christelike fundamentalisme is geen ongewone ding in Suid-Afrika nie, hoewel die VSA wat getalle en ekstremiteit betref ons natuurlik oortref.
Fundamentalisme spruit, ten minste deels, so het ek al iewers gelees, uit ’n gevoel van ’n identiteitskrisis. Die kerk van Jesus beleef ’n stewige identiteitskrisis in Suid-Afrika tans. Die fondasies van baie mense se geloof is nie meer wat dit eens was nie. Dis maar ’n tipiese proses van aksie en teenreaksie. Daar word maar gesoek na ’n gemeenskaplike vyand, veral daar waar mense hande in die hare sit.
Dit is altyd goed om ’n gemeenskaplike vyand te hê. Vra maar vir die mense daar in die Uniegebou, wie se ‘vyande’ deesdae maar grootliks in eie geledere sit. Of anders gestel, hulle is hul eie grootste vyand.
Vir talle gelowiges is dit om iets te kry in die wêreld om saam teen te ‘veg’. Dit gee aan hulle ’n samehorigheidsgevoel. Dit laat hulle met die gevoel dat hulle geloof ’n spesifieke en kritiese rol in die wêreld het. Hulle is dan daar om die ‘sataniste’ uit te roei.
En vandag is ‘satanisme’ vir baie van hulle sinoniem met die sangeres ‘Lady Gaga’.
Maar die waarheid is dat Lady Gaga maar uiteindelik net nóg ’n popsanger is. Soos menige popsanger bou Gaga haar hele loopbaan op misleiding. Net soos Hollywood. Dit is maar als praktyke wat oor die algemeen menslike kultuur, die vroulike liggaam en seksualiteit stereotipeer. En dit is boonop ’n viering van oppervlakkige kapitalistiese waardes wat die najaag van materiële welvaart en die gevolglike vernietiging van die aarde verromantiseer. Maar hoekom vir Gaga uitsonder?
Want net soos wat ons as Christene maar dikwels selektief is met presies watter ‘waarhede’ ons in die Bybel aanhang, só gaan ons ook maar dikwels lekker selektief om met wie presies ons ‘vyande’ op aarde is.
Sal dit nie beter wees, as ons dan nou regtig so groot probleem met die Gaga vrou het, om dan eerder vir haar te bid in plaas daarvan om van haar te probeer ontslae raak nie?
Ek wil vra of ons, as die kerk van Jesus, kan ons nie selfs begin polities proaktief probeer werk in die wêreld nie? Wat ek daarmee bedoel is, armoede en misdaad, dit is goed en wel. Die kerk doen baie vir armoedeverligting. Baie van dit gaan ongesiens verby, en dis óók goed, want uit die Bybel kry mens die gevoel dat daar van jou verwag word om nederig te wees en bly. Nie die glorie van die wêreld na te jaag nie. En die kerk dóén sy deel van reaktief optree. Maar hoekom praat ons kerke nie oor Nkandla nie? Hoekom praat ons nie oor korrupsie nie?
En ja, hoekom praat ons nie méér oor die verkragtig van ons land se vroue en kinders nie?!
Kerke moet baie meer polities proaktief begin optree in die wêreld. Want dit is ons profetiese rol wat ons moet speel. En dit kan ’n groot verskil maak.
Maar nee, ons baklei eerder oor die Belhar belydenis en oor die ‘sonde’ van ‘herdoop’. En oor gays en wie weet wat nog als.
Ons is soos die mense in die tyd van Jesus wat eerder sit en wonder oor wie gaan die ereplekke kry as die ‘koninkryk’ eendag kom, en dit terwyl die wêreld om ons vergaan en ons sit en niks doen daaraan nie.
Hierdie is een van Barend se jongste blogs.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
