Ek wil my versuit om te sê ons as Suid-Afrikaners moet nie die ANC se kongres in Mangaung belangriker ag as wat dit regtig is nie.
Laat ek met 'n ompad begin: Die verkiesingskongres in Mangaung is sonder twyfel belangrik. Dit bepaal immers wie die land se grootste politieke party sal lei. As die regerende party het ons almal 'n belang by wat hierdie Desember in Mangaung gebeur.
Tog is die mate waarin mense na die leiersverkiesing in Mangaung kyk as 'n "draaipunt" in die politiek nie vir my geldig nie.
Ja, die leierskap bepaal die rigting waarin die party in die volgende paar jaar gaan beweeg. Maar terselfdertyd is die ANC 'n nasionale liggaam met miljoene lede, en enkele leiers kan nie die party se rigting sonder meer verander nie.
Kyk maar wat met Mbeki gebeur het: Toe hy nie gehoor gegee het aan die meerderheid se wense nie, is hy summier gepos. Dieselfde sal gebeur met enige ander ANC-leier wat nie die hoofstroom se opinie in ag neem nie.
Die ANC as liggaam het baie momentum, en 'n leier, selfs die hoofleier, sal nooit in die pad staan van die meerderheid se wense nie.
Daarom dink ek dis baie meer gepas om aandag te gee aan die heersende kultuur en die heersende denkwyses in die ANC. Ek bekommer my veel meer oor die opinie en denkrigting van die ANC-takke as geheel as wat ek my bekommer oor watter spesifieke persoon die party se president is.
Ek sal hierdie Desember met groot aandag kyk na die Mangaung-kongres, maar ek sal nie die meeste aandag gee aan die verkiesing van die party se president nie. Ek sal die meeste aandag gee aan die bespreking van beleidsposisies, en mooi luister na wat die heersende opinies is – want dít sal die werklike rigting bepaal waarin ons in die volgende paar jaar beweeg.
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
