Heelwat is die laaste week of twee gesê oor Suid-Afrika as 'n sogenaamde "mislukte staat".
Dis te verwagte dat mense dié negatiewe uitlatings sal maak na die rits negatiewe gebeure in die land die laaste paar jaar, maar spesifiek die laaste paar maande. Die feit dat stakings die land lamlê (elke jaar erger as die vorige jaar) en die feit dat Suid-Afrika as bestemming vir internasionale beleggers al slegter lyk, is natuurlik die grootste bydraende faktore wat tot hierdie stand van sake bydra.
Maar ek dink 'n mens moet verby hierdie simptome kyk en die wortel van die probleem raaksien. Suid-Afrika se toekoms word nie verongeluk deur stakende werkers, of misdadigers, of swak produksie, of selfs stygende basiese lewenskoste nie. Nee: Al hierdie faktore kan uitgeskakel word met net een ding – en dit is die nodige leierskap.
Suid-Afrika het net een werklike probleem, en dit is die gehalte van sy leiers.
Niemand kan daarmee stry dat Suid-Afrika genoeg hulpbronne het om 'n land van welvaart en groot voorspoed te wees nie. Eintlik kan Suid-Afrika, met sy voordelige hulpbronne en selfs ligging, een van die rykste lande in die wêreld wees. En, glo dit of nie, 'n land se toekoms kan verander word in net twintig of dertig jaar. Soveel ander lande het dit al bewys.
Al wat nodig is, is die regte leiers om ons te help om hierdie natuurlike skatte reg te benut. Wat ons nodig het is leiers wat die kultuur van ontevredenheid en grypsug kan uitwis. Leiers wat mense weer kan leer dat daar net een manier is om ryk te word – en dit is om baie, baie hard te werk.
Waar is hierdie leiers? In die regerende party? Beslis nie. Dit het ons die laaste 20 jaar op die harde manier geleer.
Nee, daardie leiers is onder ons gewone mense. Die gewone eienaar van 'n klein sake-onderneming. Die middelklas-werker. Die ma wat sien hoe haar kinders sukkel. Die sakeman wat weet hoe om sy mense te lei en inspireer.
Wat ons regtig nodig het, is dat mense wat in voeling is met werklikheid, en wat nie die bagasie dra van die regerende party nie, om by die politiek betrokke te raak. Dis hierdie mense wat raadslede moet word, en drukgroepe moet stig, en plaaslike verkiesings wen. Dis hierdie mense wat hulle stem moet dik maak, en wat op grondvlak die gety moet begin draai.
Ek besef dis veel makliker om sulke mooi praatjies te maak as om dit 'n werklikheid te maak. Maar dit is werklik die enigste hoop wat ons het. Dis tyd vir gewone mense om betrokk te raak by staatsorgane, sodat soustrein-politici tot verantwoording geroep kan word. Jy, die gewone man op die straat, kan 'n politieke invloed hê.
Is daar nog mense wat dit besef? Of is dit klaar te laat vir Suid-Afrika?
Alle artikels en briewe wat op MyNuus24 gepubliseer word is geskryf deur onafhanklike lede van Nuus24 se gebruikersgemeenskap. Die opinies van lesers wat in hierdie afdeling gepubliseer word is hul eie, en verteenwoordig nie noodwendig die siening van Nuus24 nie. Nuus24 se redakteurs behou die reg voor om enige of alle kommentaar op berigte te verwyder.
